Taxi Association i kol from gudfala rod kondisen long town

Presiden blong Port Vila Taxi Association i kol long Kavman blong fixim gud ol rod long eria blong Port Vila.

Elton Worwor i talem long VBTC nius se rod problem long Port Vila i mekem ol public land transpot oli safa moa bitim disasta blong COVID-19.

Hemi talem se, “Mifala i faenem aot se rod kondisen long town bae i wan bigfala disasta from bae i bitim COVID-19 espeseli long fanding.”

“Taem i nokat mani, yumi kriatem wan problem blong i damejem ol trak blong mifala,” Mr Worwor i talem.

“Wan pat blong wan trak i kostem bigfala mani mo mi askem blong kavman i fixim ol rod ia.

“Port Vila nao kavman i stap kolektem rod tax long hem bitim ol nara aelan.”

Mr Worwor i talem se hemi gud tinktink we kavman i stap fixim ol rod long ol aelan mbe hemi mas luksave ol rod long town tu.

“Mein sos blong vehicle inkam long Republic blong Vanuatu hemi long Port Vila, from i kat plante bus, taxi mo ol praevaet trak mbe rod i nogud nomo,” hemi talem.

“Sam aelan oli kat kolta long hem, mbe smol namba blong trak nomo oli ron long hem.”

VBTC Nius i andastan se Dipatmen blong Public Works bae i mekem ripea long ol rod ia mbe deit blong oli statem wok i no klia yet.

Media Ofisa blong Public Works Dipatmen, Antoine Malsungai, i talem se fokas blong Ministry blong Infrastructure mo Public Utilities naoia hemi blong fixim ol rod long ol aelan mbe i no long Port Vila.

Hemi talem se i kat wan budjet blong VT 300 million long ripea blong ol rod long Port Vila mbe proces blong hem i long wan yet from ol kampani oli mas bit from ol tender.

“Wok ia bae i sud hapen long manis June mo July long yia ia,” Mr Malsungai i talem.

 

 

 

 

 

(Visited 166 times, 1 visits today)

About The Author

You might be interested in