Telvet skul long Motalava i operate nomata long jalenj

Telvet French Primary long Motalava i operate nomol nomata long shotej blong tija mo klasrum.

Headmistres blong Telvet French Primary School long not east Motalava long Banks Islands, Leslyne Dini, i talemaot konsen ia long wan tim blong Public Service Commission we oli stap mekem visit long Torba Provins long wik ia.

Telvet Primary skul hemi wan long ol rimot skul long Torba provins wetem ova 50 studen, tu klasrum wetem tu kavman tija mo wan moa persen we hemi stap help aot nomo wetem ol tijing.

Mrs Dini hemi wan long olgeta tu tija ia mo hemi talem se hemi had lelbet blong tijim plante pikinini long wan klasrum.

“Wanem we i stap mifala i nosave kivim aot lesen blong evri klas wan taem from i kat tri klas long wan klasrum wetem wan tija,” Mrs Dini i talem.

“Risen from klasrum i fulap tumas mo i had blong ol skul pikinini i konsentret.

“Mo taem oli no konsentret, yumi save se pa oli nosave mekem gud long skul wok blong olgeta.

“Mi nosave tijim tri lesen wantaem long semak taem, mi mas dividem klas six i ko hem wan, klas fo i ko wetem klas faev blong mekem se oli kasem gud wanem mi traem blong tijim.

“Long wei ia oli save mekem gud long skul wok blong olgeta.”

Mrs Dini i talem se wan tija i tijim klas wan, faev mo six, nara tija i tijim klas tu mo tri mo nara voluntia tija i tijim klas fo.

“Hemia hemi wan bigfala jalenj mbe mifala i mas karemaot wok blong mifala nomo.” Mrs Dini i talem.

Bonnie David, Senior Human Resource Ofisa long Public Service Commission, i talem se konsen nomo hemi hao bae ol pikinini i konsentret from i kat tu klas i hapen long semak taem.

“Wanem we mifala i luk taem mifala i kasem Telvet Primary skul hemi kat tu blackbod insaed long wan klasrum, wan i fes long saed antap mo wan saed daon,” Mr David i talem.

“Mo klas i ko hed long semak taem.”

Torba Provincial Education Ofis i rispon blong talem se pa oli nomo save putum sam moa tija i ko long skul ia.

Tim blong Public Service Commission i stap visitim ol aelan blong Torba provins long wik ia blong jekem ol seves blong kavman long ol rurol eria blong Vanuatu.

Telvet French Primary School i jes operate long yia 2007.

(Visited 268 times, 3 visits today)

About The Author

You might be interested in