Ten niu incubator blong yus-Vila Hospital

Ten life save masin(incubator) blong ol bebe i redi blong yus long niu rum long Vila Central Hospital.

Hemia i posibol folem VT3.3 million we fes eva VBTC Radiothon fandraising long 2021 mo ol pipol i give.

Chinese Embassy i bin kivim VT600,000 mo New Zealand High Commission VT1.5 million.

Long Tuesday wik ia, evri nurse i glad blong witnisim opening blong Neo Haven, rum blong ol bebe we oli ova long 1 manis.

Dr Orelly Thyna long Vila Central Hospital i talem se niu rum ia bae i helpem ol bebe blong oli filim sef.

Hemi talem se ol masin ia bae i help bigwan blong priventem ded.

Dr Thyna i talem se festaem oli yusum nomo fo incubator long wan smol rum be naoia oli hapi from i kat 10 niu masin.

VBTC Chief Executive Ofisa, Francis Herman, i talem se i kat plan blong wan moa radiothon long Santo blong inkrisim namba blong ol glas masin ia.

Dr Thyna i talem se oli rikodem araon 309 bebe we oli nidim incubata from i kat 25 bebe oli bon long wan manis mo oli nid blong stap insaed long glass.

“Ol incubator ia, i kat plante detekta long saed blong hem, we i letem mifala i save se bebe ia temperaja blong hem i kolkol mo yumi save womem ap hem.

“Samtaem environmen we hemi slip long hem i kolkol mo yumi nid blong hitim ap blong mekem ples i wom.

“Mo sapos ol samting ia i nokat bae bebe i save kolkol tumas mo hemia bae oli ko tru long plante problem.

“Resen ia nao mifala i wantem moa incubator kwiktaem blong stopem problem ia.”

Sam oli even spendem seven manis long wan glas masin.

Doctor Caleb Vangana, Paediatrician long Vila Central Hospital i givim wan estimate yiali figa se 100 aot long 300 bebe oli bon long hospital oli nidim incubator.

Ol health otoroti i talem se naoia Vila Central hospital i kat wan totol blong 12 incubator be namba ia i no naf yet.

 

 

(Visited 60 times, 1 visits today)

About The Author

You might be interested in