Tender proses passport software-October

Tender proses blong niu passport software system long October.

Director blong Vanuatu Immigrations Services, Jeffrey Markson i konfemem long VBTC Nius long wik ia.

Mr Markson i talem se afta long tri dei workshop long Septemba oli kat sam tinktink long niu software ia mo October tender i sud stat.

“Hemia blong ol kampani i bid; Afta long hem ia bae yumi ko long wan open tender; Yumi no wantem se bae yumi mekem long wan wei we bae yumi luk wan kampani nomo mo tekem hem i kam ale disaed afta se hemi no wok. So yumi mekem wan open tender blong karem plante aplikesen i kam insaed blong ko tru long proses blong tender blong kavman. Proses ia bae i tekem sam taem so mifala i stap push long taem period blong six manis. Hemi no isi be target ia nao. Afta long ol proses ia mi tink se bae i nid tu blong kasem palemen blong karem sam disisen,” Mr Markson i talem.

Hemi konfemem se i kat enaf passport buklet i stap.

Mbe pipol we oli travel i kam long Port Vila blong pat long Labour Mobility i kohed blong komplen long raet blong kat wan passport blong travel.

Mathew Somebul blong Maewo i talem se isu blong paspot, mifala i kam stap ia mifala i fesem had taem from i travel longwe blong kam mekem passport.

“Mifala i stap wet mifala i wet long Tuesday vinis long wik ia kasem tete(Wednesday),” Mr Somebul i talem.

“Oli talem long mi se bae yu ko karem VT10,000 naoia yu kam bai mifala mekem paspot blong yu naoia. Taem mi kam blong putum VT10,000 long olgeta, oli talem long me se afta long wan manis mi kambak. Hemia long manis blong June ia, passport i no redi yet kasem Septemba ia,” Patricia Andrew blong Malekula i talemaot.

John Wadam blong Malekula i resem komplen long seves blong time.

“Oli se yufala pas bakegen long 1:30pm, taem we mifala pas oli se tomoro long 8 o’clock long moning yufala i pas baiken. Mifala i stap ful dei long ples ia, so mifala stap mifala spendem mani long kakai from mifala i liv wetem ol famili.” Mr Wadam i talem.

“Mifala i toktok wetem New Zealand blong yumi save yusum Certificate blong Identification;ol travel pepa. Long Australia bae oli kambak long yumi yet wetem wan ansa,” Mr Markson i talem.

“Fraet blong yumi naoia se sapos yumi no manejem temporari arenjmen we ol IT i putum i stap bae yumi kat isu long hem bakegen; So prioriti naoia hemi urgent travel blong ol pipol we oli sik mo olgeta seasonal wokman blong pas tru long agent.”

Mr Markson i talem se isu blong passport software hemi ko bitim wanem oli save mekem be bae oli wok blong fixim.

Complied by trainee journalists, Gracelyn Garae, Ezra Toara, Doddy Morris

(Visited 2027 times, 1 visits today)

About The Author

You might be interested in