Tes flaet long Lajmoli airport

Civil Aviation Authority i talem se bae i kat wan tes flaet tete long Lajmoli airport long Not West Santo.

Long wik ia tim blong Civil Aviation Authority mo Public Works Dipatmen i stap long Not West Santo blong mekem inspeksen long airport.

Naiany Karu long Civil Aviation Authority i talem se oli hop blong karem konfemesen blong flaet ia tete.

“Mifala i gaedem ol pipol long wea ples nao oli sud klin ap kasem mo wok i ko gud,”Ms Karu i talem.

“Wanem i stap naoia, mifala i bin klinim araon 800 mita blong eria; Lajmoli airport hemi 1 kilomita, hemi wan long ol longfala airpot long Vanuatu.

“So premiliminari tes flaet we mifala i wantem mekem blong testem airfield we preperesen i stap ko hed naoia.

“Yumi hop blong kasem konfemem blong test flaet ia.”

Pipol long Not West Santo i bin stap askem kavman blong openem bak Lajmoli airpot blong kivim seves long ol pipol.

Area Administrator blong North West Santo, Vula Charlie, i talem se taem airport i nomo operate i mekem pipol i kontinu blong spend plante long bot mo land transpot blong ko long ol ples we oli wantem kasem.

Hemi talem se ol pipol i spendem VT40,000 long wan wei nomo blong ko long Luganville town.

“Long wik ia Sanma provins i putum bigfala sapot blong fandem ol pipol we oli mekem kliarens,” Mr Charlie i talem.

Hemi talem se long wik ia Civil aviation i travel i ko daon blong mekem ol las survey.

Antoine Malsungai, Pablik Relasen Ofisa blong Ministry blong Infrastructure mo Pablik Utilities, i talem se kavman i wantem Lajmoli airport i operate bakeken.

“Hemi wan wish blong kavman blong re-lonjem airport ia mo hemia nao resen from wanem ol ofisa blong civil aviation authority tim i ko daon long Santo long wik ia blong lukluk long ol technical isu we i stap afta we i no bin yus longtaem,” Mr Malsungai i talem.

“Mo bae yumi wet long ripot.”

Lajmoli Airpot i nomo operate folem wan plen crash long eria ia long yia 2008 folem wan thick fog we i mekem pilot i nosave luk ples i klia.

Mo risal blong plen crash ia, pilot i ded mo sam pasenja i kasem ol kil long bodi blong olketa.