Tongariki/Buninga i askem COVID stik meresin

Tongariki mo Buninga i askem COVID-19 stik meresin folem 12 aktiv kes long kwarentin.

Kasem naoia Shefa Public Health i no rolemaot vaccine long Shepherds yet sins lonj blong COVID vaccine long eli June 2021.

Area Administrator blong Tongariki Buninga, Donald Firiam, i talem se oli mas kasem stick meresin blong COVID-19 blong redi taem i kat komuniti outbreak.

Mr Firiam i talem se hemi ova 7 manis nao we oli kasem COVID awenes mbe stik meresin i no ko yet.

“Mifala nao i kasem ol fes awenes blong COVID-19 vaccination,” Mr Firiam i talem.

“I kam kasem naoia, amas mani i pas vinis, mifala i no risivim ol stik meresin yet. Wanem taem bae mifala i kasem from ol COVID-19 kes i stap long kwarentin. Mo mifala i fraet sapos i kat wan outbreak long komuniti, laef bae i stap long denja.

“Mi plis olsem area administrata blong tufala aelan long Sherpherds grup, no priotisem ol bigfala aelan nomo mbe lukluk tu long ol smol aelan kaonsel long Vanuatu.”

Shefa Public Health Manager, Obed Manwo i talem se dilei blong funding i mekem tim i no ko rolemaot stik meresin long Sherpherds yet.

Ruben Kalo, wan komuniti memba longTongariki i kwestenem health ministry se wetaem COVID stik bae i kasem sherpherds grup.

“Tete COVID-19 i stap long Vanuatu vinis mbe mifala i no kasem stik yet blong stap sef,” Mr Kalo i talem.

“Mifala i stap kwestenem kavman tru long Ministry blong Health, wanem stret taem blong tekem stik?

“From mifala i fraet tumas.”

Ministry blong Health i talem se funding blong Sherpherd Vaccination we hemi ova VT 2 Million bambae i kamout long March.

Afta long hem bambae health tim i putum ol program blong vaccine.

(Visited 305 times, 1 visits today)

About The Author

You might be interested in