Tuesday, March 19, 2024
28.8 C
Port-Vila
Tuesday, March 19, 2024
More

    Torres i konsen long ATM kad yus

    Torres i askem blong stil yusum National Bank blong Vanuatu withdro slip from hemi onli wei blong aksesem vatu.

    Eria Administrata blong Torres aelan long Loh, Thomas Puntunleta, i talem se niu regulasen blong national bank blong Vanuatu i talem se pipol i mas yusum ATM kad o nara kad blong tekem mani mbe i nomo withdro slip we log olgeta bae i moa had long pipol.

    Mr Puntunleta i talem se plante pipol i ko putum komplen long Torres Eria Kaonsel Ofis from i nokat National Bank blong Vanuatu branj long graon.

    Hemi talem se bae i had blong oli ko kasem Santo blong tekem wan niu ATM kad o pasbuk from i sas blong travel long ol rimot eria olsem.

    “Fulap pipol long komuniti i yusum withdrowol kad blong sendem wan nara man i ko withdro o tekem aot mani,”Mr Puntunleta i talem.

    “Yumi andastanem se ol bank tu oli kat ol regulation blong kaedem olgeta long hao oli operate. So i no longtaem i pas, i kat wan regulation we i kam we i kaedem ol tri pati withdrowol we mifala long Torres plante taem i stap yusum ol nara man blong withdro. Hemia i abaot ol withdro slip we oli nomo alaoem mifala blong yusum mo mas yusum ATM kad o wan nara kad blong tekem aot mani mbe wetem hem ia plante oli komplen se oli no hapi mo wantem National Bank blong Vanuatu i help.”

    Mr Puntunleta i talem se National Bank blong Vanuatu hemi onli bank long rurol eria mo i mas mekem i fea long ol pipol.

    National bank blong Vanuatu i talem se hemi andastanem hae cost blong bot transfea i ko long ol klos branj long Banks mo hemi stil akseptem namba tri pati withdrawol we oli yusum withdro slip mbe i mas kat wan authorization bihaed.

    Mo tu wan pasbuk o wan atm kad blong bank i jekem bifo oli save ko hed blong givim aot mani long ol kastoma.

    National Bank i askem ol kastoma blong Torres mo Banks aelan blong sapos oli kat eni kwesten o eni isu oli mas kolem Bank Area Manager North John Alick long 5552032.

    Torres Eria Administrata, Mr Putunleta, i talem se niu rul ia i kamaot long en blong 2021.

    Hemi askem ol otoriti blong bank blong sapos oli save sendem wan ofisa i ko long Torres blong mekem awenes mo helpem pipol i andastanem gud seves ia.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen