Wan long olgeta populate eria kolosap Port Vila , Blacksands hemi wan difikel eria blong pipol i kasem pablik transport evri moning.
Rod ia, taem hemi stap long gudfala condition hemi lukim kolosap 100 trak everidei mbe tete hemi empti.
VBTC Nius i kasem toksave se plante taem ol lokol i mas wokbaot ko kasem long main rod long kolta, mo wet long ol bus we oli pas long Mele i kam o long tagabe.
“Samtaem mifala i drop off nomo long Bukura o cross rod samples ale wokbaot wetem bag rice o carton. Wokbaot i ko kasem long Master Chuan mo hemi had long olgeta we i liv daon long solwota from oli mas wokbaot longwe,” Roslyn Yato, Local mama i talemaot.
Ms Yato i talem se plante pipol oli mas wokbaot i ko antap long mein rod blong kasem bus we hemi longwe mo no isi long ol skul pikinini.
Folem hae praes blong mentenens blong ol pat blong ol trak, ol bus draeva oli klem se oli no save pas long rod ia from kondisen blong hem i kontribut ong ol hae kost blong meintenens..
“Rod long Blacksands hemi nogud; Taem yu stopem bus blong kam i had wee. So mifala i wantem se rod i fix . Yumi fixim rod fastaem,” Bus draeva, Romy i talemaot.
Stragol ia hemi stap gohed longtaem finis mo long yia ya afta long Snap Eleksen fulap pipol long Blaksands eria oli luk fowod long wok we mbai kamaot blong fixim rod blong olgeta.
“Ol pikinini blong mifala taem oli stap redi blong ko long skul, samtaem ol bus oli stap tekem olgeta putum olgeta long kros rod. Ol skul pikinini long plesia tu oli faenem i had blong kobak long haos olsem long Ohlen. Samtaem o parents oli wari from ol pikinini i kobak leit long hom,” Lokol ia i talemaot
“I kat fulap candidate we oli promes blong mekem gud rod ia be mifala i nosave se wetaem bae oli fixim.”
Wael Kavman hemi stap spendem mani blong meintenem ol rod, i gat wan samting we bae i neva stop we Weta Ofis i talem se bae i kat moa ren bae i kam bitim nomol folem La Lina sisen.
by Agnes Herbert.
