Travel bubble blong fri wei kwarentin

Vanuatu i stap pripea blong pat long travel bubble wetem New Zealand long September.

Travel bubble ia hemi blong ol Ni-Vanuatu seasonal wokman we oli ko wok long Recognised Seasonal Employer blong kat akses long fri wei kwarentin travel we i minim se taem oli kasem New Zealand bae oli no ko spendem 14 long kwarentin mbe ko stret mo wok long ol farm.

Director General blong Ofis blong Prime Minista, Dr Gregoire Nimbtick, i talem long VBTC Nius se priperesen i stap ko hed mo kaontri i expek blong pat long travel bubble ia long 17 Septemba taem akrimen i saen.

Dr Nimbtick i talem se outbreak blong coronavirus i no afektem New Zealand- Vanuatu Travel bubble priperesen.

“Kavman blong New Zealand hemi stil kat konfidens mo hop se bae i save kontrolem outbrek,” Dr Nimbtick i talem.

“So bae hemi nosave stopem nekociasen ia.

“Mo ol ofisiol i stap wok kolosap wetem olgeta blong New Zealand blong putum tuketa ol standard COVID-19 protocol mesa.

“Long las miting blong mifala long this wik, mifala i redi mbe nid blong tightem ap sam samting nomo mo redi blong saen arenjmen, yumi long Vanuatu Ofis blong State Law i kliarem arenjmen ia vinis; Bambae yumi nid nomo blong ranem tru long National Disaster Committee mo Council blong ol Minista i notem mo yumi saenem akrimen sapos New Zealand i kivim grin laet.

Dr Nimbtick i talem se naoia oli stap wok nomo long ol schedule blong ol flaet blong ko daon long New Zealand.

Hemi talem se long saed blong ol health protocol, oli komplete.

“Wik ia bae yumi wok wetem Air Vanuatu wetem ol otoriti long New Zealand blong sotem aot ol flaet ia,” Dr Nimbtick i talem.

Dr Nimbtick i talem se nara samting blong kompletem wetem ol boda managemen long Vanuatu wetem New Zealand hemi blong mekem wan exercise blong ol seasonal wokman i andastanem wanem blong mekem taem oli pat long travel bubble ia.

Kavman hemi stopem ol flaet stat long manis ia kasem long 12 september, mo Mr Nimbtick i talem se hemia blong kaontri hemi strengethenem ol Standard Operating Prosija blong bubble.

Hemi talem se New Zealand hemi glad long ol prosija we i stap in ples finis.

I no longtaem i pas, New Zealand i bin extendem wan national lokdaon folem wan single niu kes blong COVID-19.