Travel restriksen i nomo kat long Efate

Council blong ol Minister i mekem disisen blong karemaot restriksen long muvmen blong ol pipol ova long aelan blong Efate.

Prime Minister Bob Loughman i mekem anaonsmen ia long wik ia.

Hemi talem se Council blong ol Minister i mekem disisen ia folem ol negative tes risal blong COVID we helt i bin karemaot long ol klos kontak blong fes positive kes.

“Long Monday wik ia, Ministry blong Health i rilisim seken risal blong risk asesmen blong fes konfem kes blong COVID-19 long 10 November. Long olgeta 152 pasenja we oli kam long plane wetem positiv kes, 17 we oli klasifaem olketa olsem ol klos kontak oli tes negativ,” Prime Minister Loughman i talem.

“Long olgeta 12 frantline ofisiol we oli faenem se olgeta I kat risk mo oli bin ko long kwarentin long 11 November 2020, tes risal blong olketa tu i negativ.

“Mo long Tuesdei wik ia, olgeta 12 ofisa ia oli kat wan moa tes mo risal blong hem i negativ.”

Prime Minister Loughman i talem se folem ol negativ risal ia, we Ministry blong Health I bin kivim aot long Tuesday naet, National Disaster Management Ofis folem mandate blong Council blong Minister long eli wik ia, hemi mekem sam rekomendesen.

“Yumi karemaot restriksen long muvmen blong ol pipol ova long aelan blong Efate mo ol offsore aelan blong hem,” hemi talem.

Prime Minister Loughman i talem se period blong kwarentin i kambak long 14 dei.

Hem i talem se Ministry blong Health bambae i kontinu blong monitarem COVID-19 patient we i stap long isolation ward kasem taem tes risal i kam nekativ bambae hemi givim wan moa updeit long Fraedei, 20 November.

Prime Minister Loughman i talem se ol international repatriation bae i ko hed bakeken. Naoia bae everi pipol we oli kambak bambae oli mas ko tru long COVID-19 test long kwarentin.

Hed blong kavman i talem se everi Ni-Vanuatu travela we oli wantem kam long olketa medium mo ol hae risk kaontri olsem United States blong America, Europe mo Asia, oli mas kat wan negativ COVID-19 test risal bifo oli save kam in long kaontri.

Hem i talem se bambae oli nomo save alaoem in ol pipol we oli kam long ol hae risk kaontri until feta notis.

“Folem insiden blong yacht we hemi kam long aelan blong Tanna long 14 November, mi wantem asurem everi wan se Ministry blong Health bambae i sendem wan tim i ko daon tete blong save karemaot risk asesmen mo kontak tracing long olgeta,” hemi talem.

Prime Minister Loughman i talem se National Disaster Management Ofis hemi stap putum aot wan temporari restriksen blong travel long Tanna kasem taem we ripot blong Ministry blong Health i kamaot.

“Mi wantem rimaendem yumi everi wan stat long Torres kasem Aneityum blong no mas kat kontak wetem ol yacht o ship we oli kam aotsaed long kaontri mo oltaem yumi mas ripotem long kavman blong oli dil wetem sapos yu luk wan i kam long aelan blong yu,” hem i talem.

Prime Minister Loughman i enkarejem ol pipol blong kontinu praktisem olketa sef mo hygiene praktis we Ministry blong Health i talem blong daonem risk blong COVID-19.

“Hemi impoten blong yumi everi wan I koperate wetem ol othoriti we oli stap kipim yumi i sef long pandemic ia,” hem i talem.

 

 

(Visited 61 times, 1 visits today)

About The Author

You might be interested in