Tri dei blong solvem stori- British niuspepa

British High Commission long Port Vila i kat tri dei blong solvem wan nius stori we i kamaot long ‘The Times’ British daily niuspepa long United Kingdom long las wik se Vanuatu i stap wok mo benefit long ol spae blong China.

Public Relation Ofisa blong Kavman, Joe Harry Karu i talem se long wiken, Praem Minista Ishmael Kalsakau Maau’koro i singaotem British High Commissioner, Her Excellency Nicolette Brent i ko long ofis blong hem mo resem mata ia.

Prime Minista Kalsakau i talem se long Thursday wik ia long 4o’klok long aftanun bae oli solvem stori ia.

Hemi i talem se ripot blong British Nius pepa ia i spolem gudfala nem blong Vanuatu.

Long wan leta we hemi karem deit long April 15. Prime Minista Kalsakau i kwestenem from wanem British kavman i stanemap Diplomatik ofis blong long Vanuatu mbe hemi kohed blong bae-pasem ol fasin blong wok mo atakem integriti blong Vanuatu.

Prime Minista Kalsakau i putum wan wok long British High Commission long Port Vila wetem 2 wok blong mekem mo hemi wantem harem ansa blong ol wok ia long Thursday long 40’klok long aftanun.

Fes wok, hemi blong British Gavman i produsum evidens we bae i satisfaem hem olsem praem minista blong Vanuatu abaot news we ‘The Times’ niuspepa i ripotem

Mo namba tu wok, sapos i nokat eviden British kavman i mas putum wan fomol apoloji mo bae oli printim long fran-pej blong The Times niuspepa long United Kingdom.

VBTC Nius bae hemi apdeit.