Tri prisina i ronwe-Luganville

Luganville Polis i stap lukaotem naoia tri prisina we oli bin ronwe aot long Mauria Correctional Senta, Santo long Sunday long 10 o’klok long moning.

Olgeta ia i kat Samuel Molsei blong Pentecost, Tapaua Himak blong Tanna mo Joel Rarua blong Tongoa aelan.

Director blong Correctional Services, Johnny Marango i konfemem long VBTC Nius tete se ol prisina ia oli ronwe afta long wan fri taem we Ofisa long duty i givim long olgeta.

Mr Marango i talem se hemia i folem nomol routin blong olgeta prisina we oli stap gat fri taem aotsaed blong pulum fresh air.

“Oli jump ova long fens wantaem; oli climb antap mo jam daon,” Mr Marango i talem.

“Problem long plesia long hao oli ronwe hemi ofisa in-charge hemi no comply wetem standard operation prosija blong mifala. From nomoli, taem oli stap long exercise ia, hemi mas stap wetem olgeta. Mbe ofisa on-duty hemi fail. Hemi fail blong kIpim eye blong hem long ol detainees(Prisina) taem oli stap long exercise ia. Hemi aot long olgeta taem hemi kambak mbe oli ronwe vinis.

Director Marango i talem se naoia hemi wet long wan inciden ripot we ofis long Santo bai i mekem mo bai hemi tekem wan disciplin aksen agensem ofisa long duty long taem blong ronwe ia.

Hemi apil long ol pipol blong Luganville blong no haedem ol prisina long aos blong olgeta mo ko long polis sapos oli save ples we oli stap long hem.

Mr Marango i talem tu se naoia pablik sefti blong ol pipol hemi konsen blong evriwan mo oli i mas help blong provedem infomation long polis kwik taem.

 

(Visited 1904 times, 1 visits today)

About The Author

You might be interested in