Tri saspek i arest from oli stilim mani

Polis i arestem tri saspek we oli stilim ova long VT3 million long Esah stoa long Tebakor hemia long Port Vila.

I kat wan boy wetem tu gel we polis i bin holem olgeta, mo wan long ol gel ia hemi gelfren blong boy we i masterminem stil ia.

Wan Reliable Sos insaed long Esah i talem se camera i tekem wan stilman, mo hemi werem wan mask taem hemi stap muv insaed long stoa.

Sos ia i talemaot tu se muvmen blong stilman ia i soem se hemi save gud ples we mani istap long hem.

Kot i jajem stilman ia wetem wan charge blong stil, mo wan charge blong possession blong Cannabis.

Tufala gel we involv tu long stil ia i jaj wetem wan charge blong holem property we oli karem tru long fasin blong stil.

Unit blong CID i ripotem se man bihaen long stil ia, hemi bin involv finis long wan stil long Esah long manis blong June.

Long taem ia, man ia hemi stilim ol item we value blong olgeta i kasem samples VT6 million.

Polis i bin arestem hem mbe hemi bail aot mo naoia hemi kam blong mekem wan narafala ofense (rong) bakegen.

Polis i talemaot tu se mbai i gat investigation i ko hed yet blong faenem moa infomesen long stil ia.

by Agnes Herbert.

 

(Visited 2368 times, 1 visits today)

About The Author

You might be interested in