Tropical Low i save kam -Cat 2 saeklon

Tropikol Low i save kam Category 2 Saeklon taem hemi pas long Tafea long Thursday.

Duty Weta Forecaster long Weta Ofis, Tom Natick i talem long VBTC Nius tete aftanun.

Mr Natick i talem se Tafea i posibol blong kasem wind mo ren espeseli long aelan blong Tanna long Thursday naet.

“Naoia Tropikol Low i stap long Notwest blong Noumea so bae hemi muv in east saot east bitwin Efate mo Noumea; Mo likeli ko pas long yumi long Tafea espeseli long aelan blong Tanna posibli. Taem system i stap kolosap long yumi, ful Vanuatu bae i kasem ren. Mo yumi long Not bae yumi kasem sam strong not wind. Yumi long Tafea from system bae i stap kolosap long yumi bae yumi kasem ren mo wind. Mo i kat posibiliti se bae i save kam cateogory tu taem hemi stap ova long Tafea,” Mr Natick i talem.

Mr Natick i talem se system i stil tropikol low mbe janis blong i kam long saeklon long nekis 6-12 haoa hemi hae.

Hemi talem se marine strong woning i stap long solwota.

Mr Natick i talem se weta i sud klia long wiken taem system hemi aot.