Tsunami woning dilei i resem konsen

Kavman mo pipol i kwestenem wok blong Vanuatu Meteorology mo Geo-hazards Dipatmen abaot ol tidol wave woning.

Hemia i folem ol wave we i hitim Vanuatu aelan long Satete folem Tonga volcanic erapsen.

Mbe ol hed blong ofis i blamem lak blong propa data we i kam long Meteo.

Minista blong Climate Change, Honoroble Bruno Leingkone, we i lukaotem Meteo Service i stap putum presa long ol staff blong explenem wanem i hapen wetem tsunami woning long wiken.

Taem hemi toktok wetem VBTC News long Monday wik ia, Minister Leingkone i konfemem se hemi instraktem ol staff blong hem blong oli mas givim wan klia ripot.

Minista Leingkone i resem konsen ia se Fiji, Hawaii, Australia mo New Zealand i kivimaot woning festaem long 3pm long Satete abaot sabmarine volkenu erapsen long Tonga mo Vanuatiu i rilisim blong hem long 6pm we tri haoa bihaen.

Dipatmen blong Meteo mo Geo-hazards i talem se Vanuatu i depend bigwan long Pacific Tsunami Woning Senta blong kivim out ol stret woning long pipol.

Manager blong Weta Forcast Division, Fred Jockley, hemi talem olgeta oli jes risivim namba tri woning long 8:20pm, me ino bin kat woning namba wan mo tu.

Hemi talem se from we infomesen hemi no kam stret long Pacific Tsunami Woning Senta i mekem oli mas asesem gud ol information we oli karem.

“I no natinal woning senta long Hawaii, wan wan man i sendem i kam i mekem se i konfusing lelbet, “Mr Jockley i talem.

“Yumi long plesia taem earthquake i kosem wan tsunami, yumi risivim threat mesej i kam long Pacific Woning Senta long Hawaii, hemia yumi save se hemi wan konfem mesej blong putum aot.”

Mr Jockley i explenem tu se ol equipmen o fasiliti Vanuatu i kat hemi no save ditektem tsunami we i kos long wan Sub-Marine volcano erapsen.

“Capabiliti hemi set folem earthquake we hemi generetem tsunami mbe i no sabmarine volcano we i kosem tsunami so i mekem se hemi mekem yumi sek mo yumi leit blong act,” Mr Jockley i talem.

Plante pipol long Saot aelan oli fecem ol wave blong Submarine volcano blong Tonga we i erapt long Satete aftanun. Mbe Vanuatu hemi jes isuem fes woning blong hem araon 9pm.

Meteo Dipatmen i talem se ol wave ia i kasem Sanma Provins.

Wan Ofisa long Meteo i talem se hemi no bin onem siren from threat blong tsunami hemi kam mbe hemi long bigwan long ol eria blong yumi.

Director General long Ministry blong Climate Change, Esline Bule hemi talem se bai oli investigatem wok we Meteo Dipatmen i bin mekem.

“Jalenj we yumi stap fesem, Ministry bae i investiketem folem konsen blong pablik mo bae mifala i dil wetem,” Mrs Bule i talem.

Mbe Minista Leingkone i kleim se hemi namba fo taem nao we dipatmen konsen i feil blong apdeitem pipol long disasta long stret taem.

(Visited 1952 times, 1 visits today)

About The Author

You might be interested in