Tu lokol kampani blong bildim las pat blong freswota stadium

Hemi fes taem eva blong tu Ni-Vanuatu Construction kampani i winim bid blong save bildim wan stadium wei International Federation blong Football (FIFA) i fandem.

Ninane Construction tugeta wetem Atom Limited tufala i putum pen long pepa wetem Vanuatu Football from las pat blong Freshwota Stadium.

Signing blong contrak ia hemi stap olsem las pat blong construction work we tufala contrakta ia i winim bid blong save bildim Vanuatu Football Federation Stadium ia.

Football stadium ia bai hemi karem kolosap faiv handred man blong stap long grand stand mo save wajem kem.

Project Architect Shem Iauko i explenem ol pat blong projek ia.

“Inside long project ia i gat wan main grand stand we bae i save akomodatem 520 man insaed long hem. Mo i gat long not mo wes wing blong hem, hem i spectator stand we bai i karem ova wan handred man long wan wan saed. I gat rum blong jenis blong tugeta tim daon stairs we wan wan pleia i gat own locka blong hem. Mo i gat refere rum too insaed,” Mr Iauko i talem.

President blong Vanuatu Football, Lambert Maltock, i talem se projek ia hemi stap olsem wan steping ston blong ol yangfala generation blong kaontri we oli drim se wan dei bai oli save kam ol profesional player.

“Stadium ia hemi wan long ol saksesful projek we Vanuatu Football Federation i bin stap drim blong gat mo save divelopem ol football pleia blong kam moa profesonal,” Mr Maltock i talem.

Mo hemi talem too se bae hemi fes taem we Vanuatu Football Federation bae hem i save ownem wan stadium mo tu bae hemi save givim janis long ol klab blong divelopem ol pleia blong olgeta insaed long stadium ia.

Lida blong Opposition Ralph Reganvanu mo Minister blong Yut mo Sport Willie Pakoa Satearoto, i bin stap mo witnisim saining ia.

Insaed long stadium ia tu i gat ples blong ol pipol wetem disapility we oli save ko blong wajem eni kem.

Projek ia pipol bai i ekspectem blong i vinis long 2022.

(Visited 27 times, 1 visits today)

About The Author

You might be interested in