Tu man i ded folem rod aksiden long Malekula

Polis long Lakatoro i konfemem ded blong tu man Malekula tete morning, folem wan rod aksiden long eria blong Bethel long Northeast Malekula.

Commander Malampa long Malekula, David Bongranlie, i talem long VBTC se mein kos blong aksiden hemi from trak we oli pas long hem i kat problem wetem brek blong hem.

Hemi talem se eria blong Bethel,  i kat wan hill ia we trak ia i bin ron i ko daon long hem, mo hemi bin spid mo trak i turn ova from se brek i no wok gud mo tufala man ia i lusum laef blong tufala.

“ I kat eight pasenja long taem ia , tu i ded mo ol nara wan i stap long serious kondisen long Norsup Hospitol naioa,” Mr Bongranlie i talem.

“Aksiden ia i hapen bitwin haf pas seven mo 8 o’klok long tete morning.

“Tufala man we i ded ia wan i blong Wala mo nara wan i blong Rano long Malekula.”

Nurse Practisioner blong Norsup Hospitol, Philip Messev, i talem se tufala man we i ded ia oli bin transpotem tufala i ko long hospitol long morning,  mbe tufala i ded vinis.

Hemi talem se, ol nara six pipol i stap long hospitol naioa mo stap tekem tritmen.

“ I kat wan yang boy we age blong hem i samples long 12 kasem 15 yia olsem i stap long serious kondisen mo i stap long koma naoia,” Mr Messev i talem.

“ Ol nara wan oli kasem ol bigfala kill tu long ol bodi blong olketa mo oli ova 40 yia.”

Commander Malampa, Mr Bongranlie i talem se long stej ia, bae oli nosave talem wetaem bae ol man ia i kamaot long hospitol from i depen nao long dokta mbe i likely blong i kat wan emergency flaet i kam long Port Vila blong ol pipol ia i kasem tritmen, from aksiden ia i wan serious wan mo hemi festaem blong wan aksiden olsem i hapen long aelan blong Malekula.

Mr Bongranlie we hemi semtaem Chairman blong Malampa Education, i talem se hemi sori tumas from wan long tufala man we i lusum laef hemi wan tija long Malekula.

Hemi talem se, draeva blong trak we i kosem aksiden bae oli jajem hem folem loa from hemi kosem tu ded.

“ Draeva blong trak i stap long hospitol tu mbe kondisen blong hem i orate lelbet bitim ol nara wan, mo mifala i wet nomo taem hemi aot bae mifala i dil wetem hem,” Mr Bongranlie i talem.

“ Oltaem Polis i stap advaesem ol draeva blong draev wetem care mo tu talem se ol draeva i mas mekem sua se everi pat blong trak blong olketa i mas wok gud bifo oli stap sevesem ol pasenja long ol pablik rod.

“ Trak we i kosem aksiden ia hemi kat problem wetem brek blong hem.”

Mr Bongralie i askem tu Department blong Public Works blong mas kontaktem gud ol rod worthy inspeksen long ol trak from hemi impoten.

Tufala man ia we i lusum laef blong tufala i kat ova 40 yia.

(Visited 1847 times, 1 visits today)

About The Author

You might be interested in