Tu manis blong stopem COVID spread- Efate mo Santo

I kat kol blong wok tugeta long March ia mo April blong kontenem COVID-19 long Santo mo Efate.

Director General long Ministry blong Health, Russel Tamata, i mekem anaonsmen ia long Health toktok tete moning.

Mr Tamata i kol long evri lida, ol Jif, komuniti mo Jej Lida, ol mama mo Papa blong wok tugeta blong mekem se COVID i no ko long ol nara aelan blong Vanuatu.

Hemi talem se i kat tri plan blong wok wetem naoia.

“Namba wan hemi blong kontenem spread blong COVID-19 long tufala aelan ia, Santo mo Efate,” Mr Tamata i talem.

“Eria ia bae yumi traem yusum ol risos we yumi kat blong mekem se sik ia i no kasem ol nara aelan bageken. Nara samting hemi isolation, Ministry blong Health i wok wetem ol patna mo wan nao i bin kat wok vinis long Korman.

“Ating ol lesen learn we yumi lanem long ol kaontri kolosap, we God i Gud yumi learn mo mekem ol plans blong yumi. Nara samting blong fokas long hem, hemi long rolaot blong vaccine tru aot long Vanuatu blong inkrisim reit blong vaccine mo stopem eni wan blong ded.

“Plan blong Yumi, i kat tu manis blong wok akensem, hemia i minim olsem sapos long tu manis ia, yumi nosave kontenem sik ia, ten bambae yumi en ap long wan situasen we bae i mo worst bitim hemia we yumi stap long hem tete.

“Yumi sendem vinis olgeta rapid antigen tes mo swap, ol Personal Protective Equipment i ko long ol Provins blong yumi.

“Olsem we yumi stap ful Vanuatu i stap long alert level 3, mo tete bae i vinis, mi wantem talem se Ministry blong Health i stap lukluk naoia long situasen long kaontri espeseli ol data mo bae hemi save putum sam niu oda.

Mr Tamata i talem se stat tete wok long EX-FOL olsem ol isolation senta bae i ko hed.

Hemi talem se tim bae i wok blong inkrisim ol COVID tes long ol clinic long Port Vila mo raon long Efate.

Mr Tamata i talem se ol test ia tu bae i aplae long Santo taem oli kasem ol medical equipmen.

“Public Service i stap wok wetem Ministry blong Health blong fomalisem kondrak blong ol nambatri yia nes,” Mr Tamata i talem.

“Mo mi glad tu se olgeta Ni-Vanuatu health wokman we oli stap long Fiji, Australia mo nara kaontri oli stap kambak wetem help blong ol patna blong yumi. Tankiu long ol fanding mo material sapot tu we oli givim.

“Mi mas talem olsem se yumi long Vanuatu yumi advantej lelbet, mo mi save se wetem COVID-19 outbreak ia, yumi kat evri risen blong wari mo fraet mbe mi wantem talem olsem se populasen blong yumi hemi smol,  so janis blong hemi pas hemi no olsem ol nara kaontri Wol we oli kat bigfala populasen,” Mr Tamata i talem.

“Ol plans ia bae yumi involvem olgeta long kavman sekta olsem Dipatmen blong Lokol Authority, ol Jif ; Yumi mas aktivetem system blong ko daon kasem ol vilij blong yumi sapos yumi kat wan niu curfew bageken.

“Ministry blong Health hemi awea se folem curfew we i kamaot, plante man long ol aelan i no folem, ating from hemi wan niu samting olsem pandemic i kam mo i tekem sam niu experience mo tinktink long laef mo hemi wan duti blong Ministry blong Health blong mekem sua se pipol i mas save wanem blong mekem blong stap sef.

“Kavman system hemi stap vinis, hemi blong reaktivetem blong i ron blong traem kontenem. Blong mekem sua se evri wan i stap long semak pej, Ministry blong Health bae i kamaot evri 9am blong apdeit.”

Ol apdeit ia i kamaot long Health Promotion Fesbuk Pej mo VBTC i tekem link mo serem long Television blong Vanuatu, Radio Vanuatu mo VBTC fesbuk pej.

“Tankio tumas mo God’s blessing long yumi evriwan,” Mr Tamata i talem.

Helt autoriti i confirm se i gat 2 patient long Hospital.

Wan hemi stap long condition we hemi nidim plante sapot blong ol medical doctor.

Since we igat aotbrek blong sik ia las week, hemi i fes hospital patient.

Long national adress iko long nation long Thursday, Minista blong Health, Honoroble Bruno Leingkone i anaonsem se i kat 58 niu COVID-19 case we oli faenem long Wednesday kasem Thursday

55 kes hemi kamout long Shefa mo tri long Sanma Provins.

 

 

 

(Visited 1581 times, 1 visits today)

About The Author

You might be interested in