Tu niu COVID kes

Vanuatu i konfemem tu niu COVID kes long kwarentin naoia.

Prime Minista blong Vanuatu, Honoroble Bob Loughman, i konfemem nius ia tete folem tes we ol health otoriti i kondaktem.

Prime Minista Loughman i talem se tufala COVID kes ia,wan i kam long flaet blong Fiji long 24 November mo narawan i kam long flaet blong Australia long December 1.

Hemi talem se tufala i kat virus ia mbe i nokat eni saen blong sik ia.

“Bambai Ministri blong Health i sendem ol sample i ko ovasi blong konfemem se tufala i kasem wanem kaen virus blong COVID,” Prime Minista Loughman i talemaot.

“Naoia, i nokat eni indikesen blong eni COVID kes long komuniti. Mbe Efate mo ol offshore aelan bambae oli muv i ko long alert level one 9 medium risk) folem tufala niu boda keis ia. Ol narafala pat blong Vanuatu oli stil stap long alet level zero (low risk).”

Director blong Curative mo Hospital Services, Dokta Sereana Natuman, i konfemem se blood sampol blong tufala activ kes ia bai oli sendem i ko long Australia long tumuru 14 December blong faenem aot weta hemi Delta o Omicron virus.

Prime Minista Loughman i talem se COVID-19 hemi bin spred i ko long plente ples raon long wol. Fulap long ol kauntri we oli ol transit point blong travel i kam long Vanuatu, oli kat ol komuniti transmisen blong COVID 19.

“Hemia i mekem se risk blong COVID i kam long Vanuatu tru long boda blong yumi hemi hae,” Prime Minista Loughman i talem.

“Ol proses mo prosidja blong ditektem mo kontenem ol keis blong COVID -19 long boda oli impoten moa blong priventem komuniti transmission long Vanuatu.

“Nambawan fasen blong protektem yu wan, family mo komuniti blong yu hemi blong kasem ful vaksin agensem COVID-19.

Prime Minista Loughman i talem se ol vaksin olsem Astrazeneca mo Sinopharm oli sef mo efektiv from oli save daonem bigfala sik, spendem taem long hospital o ded long COVID-19.

Hemi tok agensem ol kiaman infomesen mo askem pablik blong trastem infomesen long Ministry blong Health.

Ministry blong Health operation blong COVID-19 vaksin bai i kontinu long December kasem January.