Tu seasonal wokman blacklist

Labour i blacklistim tufala Ni-Vanuatu seasonal wokman from harasmen blong wan homeless woman long New Zealand.

Tufala wokman ia video blong tufala i bin go rao long social media long eli July.

Labour Commissioner, Murielle Meltenoven, i talem se dipatmen hemi black listim tufala blong laef taem blongh nomo pat long Labour Mobility.

Long semtaem tufala wokman ia bae i fesem ol jaj we i stap akensem tufala long New Zealand.

“Ofis blong mi hemi no akseptem kaen fasen olsem,” Mrs Meltenoven i talemaot.

“Fulap long ol lokol oli pat long program blong helpem ol famili we oli stap long Vanuatu. Mo taem yumi luk tufala yangfala we pat long wan ilegol aktiviti we i akensem loa blong New Zealand mo Vanuatu, ofis blong mi bae i blacklistim tufala long program. Mo bae oli fesem loa blong New Zealand mo taem tufala i kambak long Vanuatu bae oli nomo pat long program.”

Mrs Meltenoven i askem ol  seasonal wokman blong tingbaot se oli ol abassador blong Vanuatu.

“Fulap taem yumi mekem briefing long ol wokman bifo oli aot blong ko ovasi, taem situasen olsem i hapen, i putum kaontri long wan rabis pitja mo bae kwesten olsem wan bigfala sending kaontri blong Labour Mobility,” Mrs Meltenoven i talem.

“Evri seasonal wokman taem oli travel aot, oli ripresentem Vanuatu. Oli karem flag blong Vanuatu ia oli ko stap putum long Australia mo New Zealand.

Mrs Meltenoven i talem se ol seasonal wokman oli mas folem ol advaes we oli stap givim aot.