Ureparapara i kol from wan ful taem rijista nes

Pipol blong Ureparapara aelan long Banks Islands long Torba Provins i kol from wan ful taem rijista nes blong stap long onli clinic blong olgeta.

Community Liason Officer blong Ureparapara Area Council, Nox Lilip, i talem long VBTC Torba, se sins las yia clinic ia i stap operate witaot wan ful taem rigista nes.

Mr Lilip i talem se onli nes we i bin wok long dispensary ia i aot long las yia.

“Mifala i bin kat wan nes blong Solomon Islands i wok long dispensary ia mbe from sam isu, nes ia i aot mo naoia hemi stap wok long Santo,” Mr Lilip i talem.

“Taem nes ia i aot, mifala i experiencem wan inkris long namba blong ol ded long aelan.Plante long ol ded ia hemi ol pipol we age blong olgeta i stap long 30 kasem 50 yia.

“Hemia hemi risen why mi stap resem isu -Mifala i nidim wan ful taem rijista nes we bae i stap long dispensary blong aelan.”

Mr Lilip i wantem ol health authoriti i tekem aksen mo talem se ples we clinic ia i stap long hem, i nid blong oli lukluk long hem from blong akses long health seves hemi rili had.

“Plante long ol residen blong Ureparapara oli liv long Divers Bay long saot blong aelan mo clinic ia i stap long not west saed blong aelan we hemi fo haoa blong kasem,” Mr Lilip i talem.

“Wetem pua rod kondisen, hemi had blong pipol i ko kasem clinic blong tekem tritmen.

“Blong kasem clinic long solwota hemi wan bigfala jalenj tu  from dok eria i fesem solwota mo hemia i mekem laef i moa had long pipol.”

Community Liason Officer i talem tu se lak blong akes long secondary skul hemi wan nara bigfala jalenj we ol pipol blong Ureparapara i fesem.

Hemi talem se “ I kat wan bigfala namba blong skul drop aot long aelan ia from i nokat wan secondary skul long ples ia.”

Mr Lilip i kol long Ministry blong Education mo Training blong mas putum yia Seven mo Eight long Shem Roley skul we hemi stap olsem wan skul nomo long aelan.

Torba Province I kat nomo wan secondary skul we i stap long aelan blong Vanualava mo Mr Lilip i talem se plante long ol pikinini we oli stadi long skul ia i faenem i had blong leko ol parents blong atendem skul.

Ureparapara hemi namba tri bigfala aelan long Banks group blong ol aelan long Torba Provins mo i kat wan population blong 400.