Vanua’aku party i selebretem 50 yia

Politikol Pati we i lidim New Hebrides blong kasem Independens long 1980 i selebretem 50 yia blong hem.

Vanua’aku Party i bon long 17 August 1971 mo hemi selebretem Golden Jubilee blong hem long Lenakel town, Tanna long wik ia.

Foma Head blong State we hemi guest speaka long selebresen ia, George Sokomanu, we i kat 85 yia, i talem se heart blong hem i fulap long joy.

Mr Sokomanu i talem toktok ia taem hemi stap adresem ol sapota blong Vanua’aku parti mo pipol blong Tanna.

“Mo semtaem tu i putum tears long eye blong mi from mi tinkbaot ol fren blong mi we mifala i bin stap tuketa,” Mr Sokomanu i talem toktok ia mo hemi krae.

“Hemia blong faetem tufala Kavman(Bristish mo Franis) blong yumi kat fridom blong yumi.

“Bristish kavman i bin stap talem vinis se wan dei oli aot, bae mifala i mas lukaotem ples blong yumi.

“Party i bin develop mo wan bigfala miting i hapen long Paton Memorial jej long Port Vila hemia long Owen hall we yumi jensem nem ia kaljarol association i ko long New Hebrides National Party.”

Presiden blong Vanua’ aki Pati mo semtaem Prime Minista blong Vanuatu, Honoroble Bob Loughman i talem se party i mas tekem wan niufala direksen.

“Insaed long hom blong yu, yu stap mekem wan samting we yu filim se i no stret, jenisim,” Prime Minista Loughman i talem.

“Sapos yu stap raorao wetem fren blong yu long graon, jenisim, tekem niu direksen.”

Prime Minista Loughman i talem se taem angel i toktok long trifala wise man long Bible, hemi talem se oli folem star mo mo worshipim baby Jesus afta long hem oli mas folem wan difren rod.

Hemi talem se semak wei Vanua’aku party i mas tekem difren direksen.

Mr Sokomanu i talem se emi praisem God blong emi joinem ol sapota blong Vanua’aku Party long Golden Jubilee ia.

Lonj blong monumen blong makem Golden Jubilee, kating blong cake, medal presentasen mo faea works blong endem selebresen.

 

(Visited 146 times, 1 visits today)

About The Author

You might be interested in