Vanualava Jif; Niu bridge mo rod blong ol fama

Vanualava i askem kavman blong lukluk bak long plan blong gud rod akses.

Jif blong Sola, Vanualava we Torba hedkota i stap long hem, Jif Oldfield Paulicap, i talem long VBTC Nius se aelan ia i bigwan mo i kat bigfala populasen blong ol lokol fama we oli stil stragol blong winim vatu from i nokat rod long ol rimot eria blong kasem maket long Sola.

Jif Paulicap i talem se ol fama i travel bigwan long long solw taem solwota i nogud, ol fama long rimot pat blong Vanualava i nosave tekem lokol produs i ko long Sola.

“Long east saed blong Vanualava, rod i stat long Sola town i ko vinis long Wosaga mo Vatrata, ale long nara saed blong east rod i stap long airport long Sola i ko kasem long Vatop,”Jif Paulicap i talem.

“Ples long Vatop ia nao Selva mo Alket riva i stap long hem we i no sef blong pipol i pas long hem from crocodile. Fulap taem ol skul pikinini i faenem i had blong kam kros long riva ia. Taem ren i ren riva i ko antap wetem hae taet blong solwota.

“Hemi dileilem sik man blong kam kros long riva blong kare tritmen long Sola hospital.”

Wan Fama blong Quanlap long East Vanualava, Alphonse Yemen, i talem se oli wantem blong Kavman i bilidm wan niu bridge krosem tufala riva blong crocodile ia.

“Plante taem ol mama mo ol papa i riskim laef blong olgeta blong krosem wan oldfala bridge long ol riva ia mbe hemi no sef from bridge i oldfala” Mr Yemen i talem.

“Kavman sapos i save helpem mifala blong bildim wan gudfala bridge blong save helpem ol mama we oli kat bebe blong kasem health seves, o ol disabiliti pipol blong kasem seves blong kavman.”

Mr Alphonse i talem se East Vanualava i kat tu association blong ol lokol fama we oli stap saplaem kakae i ko long Torba Provincial Hedkota.

“I kat nara fama mbe samtaem oli wokbaot nomo wetem ol prodak i ko kasem long Sola we hemi longwe tumas,” Mr Alphonse i talem.

“So wetem tintink blong kavman i bildim wan niu bridge, mi biliv se bae i helpem ol fama mo bae i kat moa fama we oli interes long prodaktiv sekta from bae i kat rod mo gudfala bridge.”

Mr Yemen i talem se east Vanualava hemi pat blong Torba Provincial kavman.

“East Vanualava tu hemi pat long eleksen tu mo mi plis blong ol otoriti i luksave mifala from sola hemi onli ples we mifala mas kasem blong winim vatu, “Mr Yemen.

Wan lokol bot captain blong Vanualava, i talem se plante fama oli travel tu haoa long bot blong kasem Sola.

Hemi talem se solwota blong Torba hemi raf mo open solwota mo ol fama i rili fesem had taem.

Long eli October, Minista blong Infrastructure mo Pablik Utilities, Honoroble Jay Ngwele, i bin kat miting wetem ol jif blong Vanualava mo oli jif i askem hem blong tekem rod blong aelan ia wan prioriti.

Antoine Malsungai, Public Relation Ofisa blong Ministry blong Infrastructure mo Public Utilities, i talem se kavman i kat plan blong bildim ol niu rod, jetty, mo wharf blong ship long Torba provins.

Mbe Mr Malsunagi i talem se hemi nid nomo blong priotisem ol developmen mo implementem.