Vanuatu Aquatics i ranem swimming camp

Vanuatu Aquatics Federation hem i bin ranem wan swimming camp long wan wik skul holidei blong olgeta skul pikinini long Port Vila.

Swimming Camp ia hem i tekem ples long Mele Beach Bar we hem i karem 18 pikinini we oli patisipet long fo dei blong swimming camp ia.

Frank Vira olsem Vanuatu Aquatics Development Officer, i talem se olgeta pikinini oli bin lanem fulap skil long swiming camp ia.

“Mifala i ranem ol skil blong hao blong yu surf insaed long wota mo sam kem long solwora mo sanbij. Wan long ol skil we mifala i stap ranem hem i long saed blong sefti skil, lanem hao blong yusum laef jaket mo swim wetem laef jaket mo save hao blong yu save kip wom insaed long wota taem we yu werem laef jaket,” Mr Vira i talem.

Hem i talem se oli bin ranem tu sam long olgeta Spider Polo kem. Long taem ia oli bin kivimaot sam gudfala mesej long ol pikinini.

“Ol mesej blong ol dei ia hem i rispek. Hao blong yu kam wan gudfala lisina mo hao blong yu kam wan gudfala lida insaed long ol komnuit. So mifala i bin mekem program ia blong fo dei.”

(Visited 11 times, 1 visits today)

About The Author

You might be interested in