Vanuatu bae i nosave lusum visa fri akses

Ol othoriti we oli lukaotem citizenship program i sakem aot nius we i kamaot long social media se Vanuatu bae i save lusum visa fri akses blong hem i ko long European Union mo United Kingdom.

Long nius storian ia, i talem se European Union mo United Kingdom i tekem disisen vinis blong kanselem Vanuatu long visa waiver from i nokat gudfala screening we i mekem se Vanuatu i save stap long blacklist blong European Union mo United Kingdom.

Storian long social media ia i talem se olgeta ofisiol blong European Union mo United Kingdom i talem se Vanuatu bae i save stap long blacklist tu blong enterem wan kaontri blong olgeta from i save kat ol alegol aktiviti we i tekem ples.

Mbe Director blong Foreign Affairs, Yvon Basil, i talem se nius ia i no tru.

“Yumi bin jekem ol infomesen ia wetem tufala patna blong yumi, European Union wetem United Kingdom mo oli talem se hemia i no nius we i kamaot long olgeta,” Mr Basil i talem.

Floyd Mera, Head blong Financial Intelligence Unit, i talem se olgeta nao i stap mekem screening ia mo hemi wan tuff wan lelbet.

VBTC Nius i andastanem se Act blong Financing Service Commission, las kavman i bin mekem sam jenis long hem blong givim moa pawa long ofis blong Financial Intelligence Unit blong mekem screening mo investikesen long hu ol pipol stret pipol blong save tekem paspot blong Vanuatu.

“Mifala i aware long nius ia mo bae mi mas talem se netwok system we mifala i stap yusum naoia hemi mo efectiv mo loa i protektem blong karemaot ol investikesen,” hemi talem.

“Ol pipol we yumi stap alaoem olgeta blong akses long program ia hemi ol pipol we oli kat gudfala rikod mo oli no pat long eni criminal aktiviti.”

Tu lokol long Port Vila i bin resem konsen long program ia.

Peter Sali, i talem se paspot blong Vanuatu, hemi wan identity we mama loa i protektem mo i tabu blong salem.

Pastor Phil Matariki, i talem se kavman i mas faenem ol nara wei blong helpem Vanuatu mbe no blong salem paspot.

Nomata long ol toktok ia mbe Minista blong Internal Affairs, Honoroble Ismael Kalsakau, i talem se kavman i trastem system we i stap naoia mo hemi asurem evriwan se bambae hemi taetenem ap citizenship investmen.

“Yumi stap traem blong taeten ap system long wan we wei we i kat transparen dil,” hemi talem.

“Interest hemi blong komitim yumi long economic blong Vanuatu.”

Financial Intelligence Unit i talem se bae oli tekem ap konsen blong Lida blong Opposition.

European Union i kat 28 memba kaontri blong hem mo wan nao hemi Vanuatu.

 

 

 

 

 

 

(Visited 277 times, 1 visits today)

About The Author

You might be interested in