Vanuatu blong expotem manioc ovasi

Vanuatu bae i save kasem ova VT 40million long rural ekonomi taem hemi stat expotem manioc i ko ovasi long May.

Toktok ia Director General long Ministry blong Agriculture, Moses Amos, i talem taem oli openem harvest blong manioc farm long Epule long Efate hemia long wik ia.

Moses Amos, i talem long VBTC Nius se hemi wan bigfala ajivmen long history blong Vanuatu from turis i nomo kam insaed long kaontri from COVID.

Mr Amos i talem se kavman i mas enkarejem mo asistim ol primari industri blong save circulatem mani insaed long kaontri.

Hemi talem tankiu long pipol blong Epule long Efate blong save mekem developmen ia i hapen.

Project Infrastructure mo Export Manager long Ministry blong Trade, David Seule, i talem se projection blong 25 hekta kasava fama asosiasen inkam blem bae hemi araon VT 33million vatu.

Hemi talem se New Zealand, Australia wetem New Caledonia i odarem vinis ol manioc blong Vanuatu.

“Long wan manis, New Zealand i wantem Vanuatu blong i expotem faev kontena blong manioc long wan manis,” Mr Seule.

“Brisbane long Australia hemi wantem tri kontena blong manioc long wan wik.

“Market long Noumea long New Caledonia, i wantem manioc blong Vanuatu long wan manis.

“Ministry bae i wok wetem ol fama blong mitim demand blong ol market ia blong evri fama i luk vatu blong olgeta.”

Director General, Mr Amos, i talem se wan fama bae i save winim ova VT 1 million vatu sapos hemi expotem manioc blong hem i ovasi.

“Yumi long agriculture i enkarejem plante lokol prodaksen mo hemia i wan projek we yumi tinktink bigwan mo inkrisim prodaksen i ko ovasi,” Mr Amos i talem.

“Mi talem tankiu long Governor blong Reserve Bank blong save help long wan trakta blong blowerem 25 hekta blong graon blong planem ol manioc we naoia bae yumi expotem.

“I kat plante variety blong manioc we yumi planem mbe curry manioc we yumi produsum hemi wan long ol bes long saot Pacific.

“Bae yumi expotem eni varieti blong kava.”

Mr Seule i talem se manioc ia taem oli boilem i sopsop mo i sweet.

Director blong Industry mo Trades, Jimmy Rantes, i apil long Vanuatu Bureau blong Standard mo Dipatmen blong Biosecurity blong wok tuketa blong mekem se projek ia bae i save hapen mo helpem ol fama long kaontri.