Vanuatu i expotem lokol kakae i ko ovasi

Vanuatu i expotem tu kontena blong manioc mo taro i ko long New Zealand long wik ia.

Prime Minista blong Vanuatu, Honoroble Bob Loughman, i talem se hemi glad blong silim tufala kontena blong ko long maket ovasi.

Hemi talem tankiu long Papa God antap from ajivmen ia.

Dipartment blong Industry wetem patnasip blong People Infrastructure mo Export Vanuatu Limited i fulumap tu kontena blong root crop blong 38 tan blong manioc we i kam long ol fama blong Epule mo ol fama blong Saot Epi mo West Ambrym i donatem fo tan blong Taro blong i ko long long New Zealand.

Manager blong People Infrastructure mo Export Vanuatu, David Seule, i talem se plan hemi blong sendem tri kontena blong lokol rut krop evri tri manis.

Acting Director General blong Ministry blong Trades mo Industry, Jimmy Rantes, i talem se kavman i kontinu blong enkarejem prodaktiv sekta espeseli long taem we turis i nomo kam long Vanuatu folem sik blong COVID.

Hemi talem se program ia hemi pat blong plan blong kavman mo hemi gud we kavman i mekem i hapen.

“Yumi enkarejem ol fama blong yumi blong planem moa long ol lokol kakae blong yumi salem moa kakae blong yumi i ko ovasi,” Mr Rantes i talem.

“Wei ia mani i kasem ol hadwok fama blong yumi long ol aelan.

“Tu fes kontena blong manioc mo taro i soem se yumi save export ol lokol kakae blong yumi i ko ovasi.

“Ol activiti olsem bae i kontinu blong helpem ol fama mo semtaem helpem kavman blong kolectem mani tru long tax.

“Mo tu sapotem ol impoten seves i ko long pipol blong hem.”

Vanuatu bae i save kasem ova VT 40million long rural ekonomi taem hemi stat expotem manioc i ko ovasi long May.

Toktok ia Director General long Ministry blong Agriculture, Moses Amos, i talem taem oli openem harvest blong manioc farm long Epule long Efate hemia long wik ia.

 

 

 

 

 

 

(Visited 358 times, 1 visits today)

About The Author

You might be interested in