Vanuatu i kasem presa blong tekem bak ol seasonal wokman

Gavman blong Vanuatu i kasem plante presa long New Zealand blong tekem bak ol Recognised Seasonal Wokman.

Spokespersen blong COVID-19, Len Tarivonda i konfemem mo talem se Kavman blong New Zealand i agri blong repatriation blong ol seasonal wokman i stat long manis ia June.

Be Mr Tarivonda hemi talem se hemia bae i depend plante long kapaciti blong kwarentin we Vanuatu hemi kat.

“Yumi save tekem olketa I kambak be kwarentin nao wan isu from yumi nidim moa rum blong hotel mo sam moa man paoa blong lukaotem olketa,” hemi talem.

“Mifala understanem se plante contract blong olgeta I vinis mo sam nomo oli stap wok yet.”

Mr Tarivonda i talem se COVID-19 Advisory komiti i kat wan miting tete blong mekem wan disisen long hem.

Hemi talem se i kat wan totol blong 1,040 long olgeta seasonal wokman long New Zealand we oli stap long list blong kam bak long stej tu.

“Festaem mifala arem se 800, afta i ko long 900 mo namba i stap jenis evri taem, “Mr Tarivonda i talem.

“So namba ia nao mifala putum i stap.”

Ol fama long New Zealand i putum plante presa long kavman blong olketa blong hemi askem Vanuatu blong repatriatem ol citizen blong hem we oli holem seasonal visa mo oli stranded long New Zealand from COVID-19.

Wan sesonal wokman i talem long VBTC se hemi wantem kambak mo hemi taet nao blong wok.

“Mi wan wokman we contract blong mi i vinis mo oli bin extendem mo nawia mi stap wok long wan nara fam,” hemi talem.

“Evri dei nomo bae ol fren blong mi oli askem se wetaem bae yumi ko bak long Vanuatu?”

Seasonal wokman ia i talem se hemi wan kwesten we oli nosave se wetaem bae i gat ansa long hem.

Wan nara wokman blong New Zealand i talem se hemi hapi blong wok mo mekem moa mani mbe hemi filim se hemi taet tumas.

“Mi nidim res nao from mi wan tu we oli extendem visa blong mi,” hemi talem.

 

(Visited 14 times, 1 visits today)

You might be interested in