Vanuatu i pus from debt swap

Director General blong Ministry blong Finance mo Economic Management, i talem se Vanuatu hemi stil pem ol loan blong hem no mata long COVID-19 pandemic.

August Letlet i talem se, Kavman i bin askem long stat blong yia long ol multilateral mo developmen patna blong oli movum ol loan blong Vanuatu i ko kasem nekis yia, mbe oli talem se hemi no posibol from i nokat eni polisi we i talem se bai i kat pospon blong ol loan long taem blong wan disasta.

Hemi talem se, ol lastes infomesen blong Ministry blong Finance mo Economic Management i soem se loan blong Vanuatu hemi araon VT47 billion, we VT6 billion hemi blong internal loan mo VT41 billion hemi blong ol external loan.

Economic ripot blong fes haf blong yia ia, hemi talem se Vanuatu hemi stap kontinu blong mekem ol advance paymen blong ol loan blong hem.

I bin kat VT1.9billion blong external loans hemi ko long EXIM Bank blong China.

Mr Letlet i talem se naioa Kavman i stap pus blong kat Dept swap mo hemia blong askem long ol developmen patna ia, blong ol swapem ol loan blong Vanuatu blong hemi save yusum mani ia blong adresem ol narafala isu olsem climate change.

Hemi talem se Vanuatu hemi stap pus wetem ol multilateral bank se sapos oli save akseptem fact se, yumi nomo pem ol loan blong yumi mbe yumi yusum mani blong save mekem ol kaen developmen olsem climate resilien infrastructure, ol conservation eria long solwota mo National park.

Long saet blong ol Internal loans, kavman bae hemi pem ova VT600 million blong domestic bond mo bai hemi katem daon domestic debt i go daon long 11 percen.

Mo Kavman hemi kat bak ap plan hemi stap blong fasilitatem debt repaymen sapos situasen blong Vanuatu hemi kam wos.

 

 

 

 

 

(Visited 14 times, 1 visits today)

About The Author

You might be interested in