Vanuatu i stap long COVID-19 scenario 2A

Kavman i talem aot se Vanuatu i stap long scenario 2 A naioa afta long tu konfem kes blong COVID-19.

Spokespersen blong COVID-19, Russel Tamata, i talem se scenario 2A i minim se ol COVID-19 kes ia oli stap long kwarentin mo ol seves i nomol.

Hemi talem se hemia nao Prime Minister, Honoroble Bob Loughman, i bin anaonsem long toktok blong hem long wiken.

“Scenario 2 A i alaowem ol skul, wok ples, wetem ol pablik grup mit blong i ko hed nomol nomo,” Mr Tamata i talem.

“Mbe pablik i mas meintenem ol fasen blong washem gud han long sop mo wota.

“Mo tu aplaem social distancing.

“Long steij naoia, i no nid blong lokem boda o stopem muvmen blong ol studen o ol pipol from tufala pipol wetem virus ia, i no kam outsaed long komuniti, tufala i stap insaed nomo long kwarentin.

“Fulap pipol i stap talem se bae yumi lokem ol boda, hemia mi save talem se bae i no hapen naoia.

“Hemia bae i hapen nomo sapos yumi kat ol komuniti transmisen we i minim se wan persen we i kat COVID-19 i aot long kwarentin mo pasem long ol pipol o wan komuniti.”

Prime Minister Loughman i askem ol pipol blong Vanuatu blong oltaem folem ol stret infomesen long website pej blong Ministry blong Health.

“Mi olsem Prime Minister blong Vanuatu, mi wantem asurem ol pipol se Vanuatu i kat wan efektiv protocol we i stap vinis we yumi yusum long taem blong repatriation mo proses blong kwarentin,” hemi talem.

“Mo hemia mi wantem talem tankiu long ol frantline ofisa blong yumi long hem.”

Mr Tamata i talem se naoia we i stap Ministry blong Health i stap folem wan rispons plan we i bin priperem.

Hemi talem se plan ia bae oli kontinu blong lukluk long hem mo mekem sam jenis we i kat nid long hem.

“Mi wantem konfemem tu se tufala pipol wetem virus ia, bae oli muvum tufala long tete i ko long isolation ward long Vila Central Hospital,” Mr Tamata i talem.

“Mo bambae ol health ofisiol i aplaem ol strict mesa long tufala pipol ia long taem tufala i muv aot long kwarentin.

“Mi askem pablik blong no fraet mbe mas kontinu blong folem ol hygiene mo fasen blong washem gud hand.”