Vanuatu Rugby blong hostem Pacifique Treize

Vanuatu Rugby Lik hem i putum wan bid blong save hostem tu even blong Pacifique Treize.

Big intres blong spot ia rugby lik insaed long Pacific Region, long ol yia we i pas, i mekem se sam Pasifik kaontri oli putum ol bid blong olgeta blong save hostem sam Pacifique Treize Rugby Lik kem long Pacific.

Vanuatu hemi wan long olgeta kaontri we hem i putum bid blong hem tu, blong save hostem tu even blong Rugby long yia 2023.

VBTC spot i tok tok wetem Vice President blong Vanuatu Rugby Lik, Antonio Korikalo mo hemi tokbaot risen behind long bid we Vanuatu Rugby Lik ibin putum.

“Komiti blong Pasifik 13 VRL hem i join wetem olgeta blong putum bid ia iko insaed blo Queensland board i akseptem blong 2023 bai ikat ol matje,” Mr Korikalo i talem.

“Mo sapos yumi winim bid ia bai yumi wantem alaoem blong oli karem ol matje ia ikam long kantri blong yumi we mbae long semtaem mbae i eksposem ekonomi blong Vanuatu.”

Luk luk i stap naoia se i kat posibiliti blong Vanuatu i save hostem tu kems long wan season long yia 2023 sapos bid blong Pacifique Treize hem i saksesful. Mo Vanuatu i save winim entri iko insaed long Intrust Super Cup.

“Yumi nidim blong kivim moa janis long olgeta pleia we oli no save pleim wan narafala spot mbe oli save pleim rugby lik blong oli save kasem wan narafala level tru long Rugby we mbae i save sapotem life blong olgeta,” Mr Korikalo i talem.

Naoia we istap VRL hem i stap wet nomo nao long olgeta disisen we bai Queensland Board mbae hem i putumaot konsenem olgeta bids we olgeta kantri oli putum tuwodsem Pacifique Treize.

 

 

 

(Visited 16 times, 1 visits today)

About The Author

You might be interested in