Vaturisu i wantem protektem Efate

Council blong ol jif blong Efate bae i holem wan bigfala miting long en blong January blong protektem midol eria long Efate aelan.

Jeaman blong Efate Vaturisu council blong Jif, Jif Simeon Poilapa i talem se hemi impoten blong ol jif i mit blong tokbaot tingting ia from hemi relate long laef blong evri pipol blong Efate mo olgeta we i liv long Efate.

Hemi talem se midol blong Efate hemi sos blong ol impoten resos long aelan ia includim wota.

“Bambae i kat wan bigfala miting i stap long namba 27 mo 28 long manis ia January ia,” Jif Poilapa i talem.

“Bambae apil ia bambae hemi wan serious wan blong protektem eria ia from hemi impoten.

“Mo hu we i stap insaed yumi mas mekem sam disisen blong kliarem from yumi stap tokbaot capital blong yumi long Vanuatu we Port Vila i stap long hem.

“ Mo sapos yumi damejem bae i kat longfala efek blong hem.”

Jif Poilapa i talem se olgeta konsen blong resos long aelan ia hemi stap kam moa popula folem hae namba blong population we i stap long aelan ia.

Secretary General blong Vaturisu council blong ol jif, Jif Jimmy Meameadola, i talem se tingting ia hemi bin stat long 2000 finis mo i gat plante wok blong tekem ples.

Hemi se naoia we oli kat mani bae wok blong faenem boundary ia bae i tekem ples.

“Projek hemi bin stat long yia 2000 mo i bin kat sam progres i bin hapen blong talem tankiu long Shefa provins mo ol dipatmen blong Kavman olsem environment, forestry mo water,” Jif Meameadola i talem.

“Mo tinktink blong Vaturisu hemi blong tekem ap stand ia mo talem tankiu long sapot.