Vaturisu i wok long wan kastom penalti

Vaturisu Council blong ol Jif long Efate i stap wok long wan kastom polisi blong dil wetem ol pipol we oli stap kilim nara man i ded .

Jeaman blong Vaturisu Council blong ol Jif, Jif Simeon Poilapa, i talem se tingting ia bae oli presentem long bigfala miting blong ol jif blong Efate mo Malvatumauri long manis June 2021.

Hemi talem se tingting i kamap afta we pipol i no rispektem kol blong ol jif blong stopem ol fasen blong kilim i ded narafala man.

“Folem tufala kiling blong tu pipol blong Motalava aelan long Banks Islands long eli yia, Vaturisu Council blong Jif i stap plan blong putum wan kastom polisi naoia we bae i mas kam loa i dil wetem ol pipol we i involv long ded blong ol narafala man,” Jif Poilapa i talem.

“Polisi ia bae hemi involvem tu ol kastom penalti we Vaturisu hemi plan blong putum long futja.

“Polisi ia bae hemi kam long Malvatumauri mo Kavman blong lukluk long hao blong enfosem.

“Ol viktim blong ol famili ia hemi olgeta we oli kontinu blong safa afta we ol love wan blong olgeta i ded mo espeseli nao olgeta we famili i dipen long olgeta blong mekem vatu blong helpem famili evri dei.

“Mo hemia bae oli had blong fogetem.”

Jif Poilapa i talem sori bigwan long tufala ded blong tu pipol blong Torba ia.

“Ded ia hemi wekem ap yumi ol jif blong Efate blong yumi mas lukluk long wan nekis step,” Jif Poilapa i talem.

“Mo i naf blong yumi silip mo wajem ol ded ia we i stap hapen long aelan blong yumi Efate.

“Yumi mas wok had naoia blong mekem wan loa we we i strong blong pipol i stop blong tekem aot laef blong nara man.

“Kastom i mas kat wan polisi blong ol crime olsem.

“Wetem hem ia, mi wantem talem bigfala sori i ko long Presiden blong Malvatumauri, Jif Wemal Tuwo Vano, Willie Grey Plasua, long ded blong tufala wantok blong hem blong Banks Islands.”

Olgeta Woman organisation i askem blong i gat moa strong penalti long ol pipol we i kilim i ded narafala man.

Oli askem blong Kavman tu hemi enfosem ful penalti anda long loa we hemi laef taem jail blong wan man we i mekem fasen olsem.

Vaturisu Council blong ol Jif conference bae i stap long Emua vilij long 21 kasem 24 June 2021.

(Visited 129 times, 1 visits today)

About The Author

You might be interested in