VBTC i resem ova 3million blong incubator

Vanuatu Broadcasting Mo Television Corporation i resem VT 5million long fes radiothon blong pem ol niu incubator blong Vila Central Hospital.

Presiden blong VBTC Staff Social Club, Leah Lowonbu, i talem se VBTC i pem wan total blong 10 incubator aot long mani we hemi resem blong sapotem ol premature bebe.

Hemi talem se VBTC i mekem paymen blong ol incubator ia long Vila Central Hospital long wik ia.

“Transfea blong 46,500 US dolla o VT 5million vatu hemi hapen long wik ia long Bred bank Vanuatu, “ Ms Lowonbu i talem.

“Mani ia i ko long wan Australian kampani long New South Wales we oli singaotem South Autral Proprietary Limited.

“Wan incubator hemi kost araon VT504,990.

“VBTC bae i pem seven incubator mo New Zealand High Commission long Vanuatu bae i kivim nara mani blong pem tri moa incubator.”

George Toukoune, Tim Lida long Vanuatu Events & Media Enterprise long VBTC, i talem tankiu bigwan long heart blong ol pipol we oli mekem taem blong kam donate long broadcast haos.

Hemi talem se hemi wan histori event from plante pipol i donate from wan gudfala samting we bae i benefitim ol pikinini long futja.

“Long bihaf blong mifala ol staff blong VBTC, mifala i wantem talem tankiu long pablik we oli stap long Vanuatu mo long ovasi we oli save givhan long VBTC Radiothon long yia ia,” Mr Toukoune i talem.

“Ol incubator bae i help blong sevem ol pikinini.”

Bae i tekem eight kasem 10 wik olsem blong ol incubator ia oli save kasem kaontri,” Ms Lowonbu i talem.

 

 

 

 

(Visited 97 times, 1 visits today)

About The Author

You might be interested in