VBTC i talem tata long Vodafone CEO

Vanuatu Broadcasting & Television Corporation i talem tata long Chief Executive Ofisa blong Vodafone Vanuatu Limited, Barlen Lutchmoodoo tete afta eight yia seves long Vanuatu.

VBTC Chief Executive Ofisa, Francis Herman i talem tankiu bigwan long wok blong Mr Lutchmoodoo we i stap sapotem VBTC espeseli long technikol eria.

Mr Herman i talem se Mr Lutchmoodoo i sapotem bigwan taem VBTC i  kat problem wetem ol transmita blong hem.

Hemi talem se Lutchmoodoo hemi no lukluk long hao blong mekem mani nomo mbe hemi helpem bisnis blong gro.

“Barlen long behaf blong tim mifala i wantem talem tankiu long yu personali,” Mr Herman i talem.

“Passion mo komitmen blong yu long Vodafone mo Vanuatu hemi bigwan tumas. Mo mi tink yu mo tim blong yu i rili gud long wanem we yufala i stap mekem. Yu helpem mifala mo yu ko hed blong helpem komuniti.

“Tankiu long kontribusen mo honesti; tankiu blong sherem tinktink long hao vodafone i save help blong mekem bisnis blong mifala i gro. Mo mifala i wishim yu blessings wetem famili blong yu.”

Aotgoing Chief Executive Ofisa blong Vodafone Vanuatu Limited, Mr Lutchmoodoo i talem se telecommunication mo media hemi powerful.

“Pipol i nidim communication mo media hemi letem man i save long wanem i stap hapen,” Mr Lutchmoodoo i talem.

“So tufala institution ia hemi pawaful long wan societi. Mi inspire long hao Mr Herman i manejem VBTC mo ol staff blong hem folem ol jens we i stap hapen mo hemi wan bigfala ajivmen. Tankiu long ol toktok we yumitu i gat from hemi rili gud. Mi hop frensip ia i ko hed mo i no stop long plesia long interest blong ol pipol. Wanem we yumi stap sevem hemi ol pipol.”

Mr Lutchmoodoo i talem se VBTC hemi national broadcaster blong Vanuatu mo hemi impoten blong sapotem.

Hemi talem se vodafone hemi wan private kampani mo i mekem mani mbe hemi sud be reasonable mo invest long society.

Mr Lutchmoodoo i talem se ova long 5 yia, VT3 billion blong invest long netwok mo naoia i kat 100% 4G.

Hemi talem se hemi no profitable mbe hemi blong mekem sua akses blong netwok i kasem ol rimot eria.

Mr Herman i talem se VBTC i luk fowod blong wok wetem nekis CEO blong holem taet frensip ia.

Mr Lutchmoodoo i kam long Vanuatu long 2014 mo long taem ia kampani hemi stil brand Telecom Vanuatu Limited.

(Visited 672 times, 1 visits today)

About The Author

You might be interested in