VCH sewage system stil wan konsen

Ol health ofisiol i talem se oli stap wok yet blong fixim sewage system ia we i stap kosem polusen long namba 1 lagun long Efate.

Acting Director blong Curative mo Hospital Service, Dr Sereana Natuman, i talem se oli stap wet blong kontrakem wan kampani blong mekem ripea.

Long November 2020, Waterwaste Tasfos i talem i putum aot wan penalti notis folem direksen notis we oli putum aot blong ol otoriti long mein hospitol i stopem ol doti blong hospitol we i stap ko daon long Erakor Lagoon.

Push blong ol fixim seawage system i kam afta we Water Dipatmen i direktem helt blong mas fixim leakage blong system last yia o oli save faen VT5 million.

Mbe kasem tete i nogat eni work hemi tekem ples yet.

Erie Sami long Waterwaste taskfos komiti, i bin talem se bigfala hospital long town i kosem bigfala amaon blong polusen long lagoon ia olsem ol doti blong sewage o waste blong toilet, blood mo ol chemical we hemi ko direk long lagun ia.

“Hemi wan long ol outstanding isu, yumi bin toktok wetem olketa long hospital plante taem mbe mi luk i nokat eni aksen,” Mr Sami i talem.

“ Mi tink hemi taem yumi stat putum aot ol notis ia i ko long ol risponsibol othoriti mo mi tink Kavman i mas kliarem fes blong hem festaem bifo hemi stat tajem praevaet sekta mo mekem compliance mo enfosmen.”

“Hemi wan big isu tu mo hemi wan samting we mi mi wari  long hem; Taem frame blong wok i bae mi nosave talem mbe budget i kat mbe i jes proses blong faenem kontraka,” Ms Natuman i talem.

Ofis blong Acting director blong Vila Central Hospital i bin talem long last yia se oli stap rikwestem long ol donor patna VT1.5 million tru long Department blong Strategic Policy mo Aid Coordination blong mekem temporary fix long sewage system. From we mane ia hemi nogat long budget blong Kavman.

Water Dipatmen i stap wok wetem ol nara stakeholda blong traem pusum Ministry blong Health blong mekem ol neseseri step blong fixim drainage.

Hemi no kivim eni moa apdeit abaot isu blong faen we oli bin putum long ministry blong Health.