Visa blong Chiko Farm ona i kansel from alekesen blong tretening

Ona blong Chiko Poultry Farm, Ken Thode, i stap live ilikoli naoia long Vanuatu from Immigration Department hem i bin kanselem visa blong hem.

Jeffrey Markson, Director blong Immigration Department, i talem se oli bin risivim sam komplen abaot tretening we Mr Thode i stap mekem, stat long las yia vinis i kam kasem yia ia.

“Las yia i kam hem i bin stap tretenem ol wokman blong hem blong stum olgeta long masket mo hem i bin stap sut long masket long site long Chiko Farm,” Director Markson i talem.

Hem i talem se oli bin holem ol miting plante taem wetem ol staff blong hem folem ol komplen se laef blong olgeta i nomo sef.

Mr Markson i talem se oli bin stap monitarem hem kolosap mo oli disaed blong kanselem visa blong hem long manis June yia ia.

Wan wokman long Chiko Farm, Joseph Pakoa, i mekem alekesen se hem i bin stap long naet we Mr Thode i bin sut long masket.

“Mi stap long aos long naet. Mi ron i kam mbe ol famili ia oli stap benben daon nomo mo stap ron from cartridge ia i ko tru long wire mo ko tru long kapa mo i kam klisim olgeta,” Mr Pakoa i talem.

“Everiwan i ron we, sapos wan long olgeta i stap long saed long taem ia long karen, ating bae cartridge i karem hem long taem ia.

“Mbe laki nomo se ol boi ia oli wise oli ron fastaem bifo cartridge i kam.”

Mbe Ona blong Chiko Farm, Kenneth Thode, i talem se ol alekesen ia oli no tru mo hem i stap tekem kes ia i ko long kot.

“Mi devastated wetem kanselesen blong visa. Hem ia i nidim investikesen from oli no bin investiketem,” Mr Thode i talem.

“Mi wantem ol pipol ia blong stanap mo ko pablik sapos hem ia hem i tru mo talem sapos mi bin tretenem sam wan wetem wan masket. Mi wantem se oli kolo polis, wae nao polis i no bin kam investiketem mi.

“Mi wantem ko pablik, mi wantem stori ia i ko pablik, from hem i no tru.

“Ol pipol we mi gat problem wetem ol mo bae mi mas admitim, i bin gat wan tred we mi mekem wan taem, hem i wetem ol man we oli stap smokem marijuana, oli talem se bae oli kam bonem daon fam blong mi.

“Mo mi talem se okay yufala kam bonem daon fam blong mi bae yumi luk wanem bae i hapen. Mo mi bin gat wan witnis long car long taem ia we mi talem ol samting ia.

“Mi wan bikfala investa long ples ia, mi kam long ples ia blong helpem kaontri. Mi bin stap mekem hem ia blong nine yia. Mi bin live long ples ia blong 11 yia mo everi samting mi mekem seven dei long wan wik, hem i blong helpem kaontri. Mi no kam long ples ia blong profit, mi save pruvum hem ia.”

Thompson Pakoa, Political Advisor blong Ministry blong Trade, i talem se wanem we Immigration Department hem i mekem i folem loa blong hem mbe Vanuatu i mas protektem indastri ia.

“Wanem we ministri ia hem i konsen long hem se tede yumi no stap long wan nomol situation mo hem i wan taem we konsen blong minista hem i talem se bambae yumi mas protektem hanful blong indastri we yumi gat,” Mr Pakoa i talem.

“So long taem blong COVID-19 wetem ifek blong hem, Kavman i mas traem as maj as posibol blong protektem indastri ia.”

Director blong Immigration Department, Jeffrey Markson, i talem se, “Loa tu hem i kivim janis long pesen konsen blong hem i save apil i ko long minister ten minister bae hem i disaed weta hem i upholdem disisen blong mi blong kanselem visa o bambae hem i disaed blong bae hem i kivim bak visa blong hem.”

Immigration Department i kanselem visa ia folem Immigation Act. No 17 blong 2010.

(Visited 1026 times, 1 visits today)

About The Author

You might be interested in