Vot from jens-Florida Tumulango

Chairlady blong National Youth Authority i talem se pipol i nid blong kat save blong votem ol raet lida.

Florida Tumulango i talem toktok ia tete long Press Klab Vanuatu abaot Leadership; how blong jusum wan raet lida blong tomoro.

Ms Tumulango i talem se ol yangfala we bae oli vot oli mas kat trast se man we oli votem bae hemi mekem jens.

“Ating hemi taem yumi jensem hao yumi vot; tete bae yu askem ol yangfala bae oli ansa se oli taet blong vot; be ating yumi vot long sam woman lida, putum difren pipol long Palemen blong yumi save luk sam jens,” Ms Tumulango i talemaot.

“Leadership hemi kambak daon long wanem ol pipol i wantem; Mo olgeta nao bae oli faenem ol raet man blong ko antap long Palemen.

“Wan bigfala samting we ol yangfala i lukaotem tete hemi wan lida blong taem; Wan lida we i stap tekem ol isu we i stap hapen insaed long ol komuniti blong yumi o ol had taem we yumi stap fesem, lida we i ko insaed ia hemi mas kat sam save long hao blong dil wetem long Palemen. Mifala i nidim ol lida we oli kat sam experiens olsem mifala long Not Pentecost i kat ol woman jif, so blong kasem level ia yu mas trein sam yia bifo yu kasem.

“Evriwan i bon wetem natural kapasiti blong kam wan lida; Yu kat ol skil mo save ia be yu stap wokbaot wetem, yumi kat ol difren kaen lida, wan blong jej o wan long kastom. Blong mi kam wan jif olsem Jif Alicta Vuti i kat ol proses blong folem blong kasem level ia. Be leadership i stat wetem yu insaed long hom, komuniti kasem long national level.

“Communication hemi impoten blong kat long wan lida. Yu mas vision blong jensem situasen mo putum pipol bifo yu.

“Yumi ol man bae yumi nosave talem se man ia hemi wan tru lida. Kwesten ia i stap long hem se hemi save mekem wok ia o nogat? Hemi kat ol fasin blong wan lida o nogat? Blong pipol i faenem aot yu mas soem aot yu wan fastaem. Sapos yu ko insaed hemi from mani o from yu mekem jens. Long tinktink blong ol man Vanuatu oli se las pawa hemi palemen be hemi rong. Pawa blong mekem jens long komuniti nao i stap long Palemen.

Vice Jeaman blong Port Vila Town Council mo semtaem Memba blong Malvatumauri, Jif Alicta Vuti i talem se wan lida i mas save hao blong toktok, hemi save hao blong serem wok long ol pipol, hemi transparent mo fea long ol disisen.

Pablik i bin harem long Radio, luk long Television blong Vanuatu mo VBTC fesbuk pej media forum ia tete.

(Visited 260 times, 1 visits today)

About The Author

You might be interested in