Vot raet-Transparency International

Pipol i mas vot raet blong seves i kasem olgeta.

Community Advocator blong Transparency International, Douglas Tamara, i talem toktok ia long Stret tok topik ‘Seves i kasem pipol o nogat.’

Mr Tamara i talem se sapos vot i no raet bae seves i no kasem pipol.

“Blong seves i kasem yumi i minim se yumi pipol i statem fastaem long namba 13 ia; Yu wan yu ko long polling station , yu no talem se yu taet from pa yu no luk wan samting from u no participeit long eleksen. Mekem disisen blong yu we yu biliv se hem nao i raet man we i save mekem ol jenses. Taem yu hapi bae ful nation ia nao i hapi.

“Sapos yu putum wan rong wan, yu bae yu harem nogud mo ful nation ia bae i harem nogud mo bae yu nosave luk seves.

” Be taem yu putum ol stret man bae oli pusum ol seves i kam kasem yumi. So mekem wan gudfala disisen long eleksen ia.”

Mr Tamara i talem se ol key polisi blong wan politikol pati i stap long National Sustainable Development plan blong 2030.

“Mi wantem help pipol blong talem olsem se wanem we oli stap tokbaot long national polisi blong wan wan politikol pati, hemi wanem we i stap long national plan blong republic blong Vanuatu; I minim se sapos yu askem stret ol eria ia we i stap be sapos yu askem wan seves we i outsaed long plan taem ia nao pa i tekem longtaem lelbet from bae oli mas faenem aot wij eria stret nao seves ia i kam tru long hem. Hemia pipol i mas andastanem, from tete yumi askem ol difren samting be sapos yumi askem stret ol key eria ia bae yumi kasem,” Mr Tamara i talem.

Mr Tamara i talem wan rikwes plan blong wan komuniti i mas folem wanem we i stap long national plan.

“Evri taem yumi mekem plan i mas link wetem plan blong 2030, sapos yumi nidim wan seves ia i mas link blong taem oli sapot be yumi save tikim se yumi kasem,” Mr Tamara i talem.

“Tete yumi kat plan ia stap ale ol nara wan kam.”

Joe Higgs Kalo, Principal Administrator blong Vanuatu National Youth Council i aksem strong ol yut we oli tekem majoriti blong vot blong mas vot.

“Long ol pas yia, yut vota turnaot i low tumas long ol constituency blong yumi; Ol yangfala i mas ko long ol polling station,” Mr Kalo i talem.

“No komplen taem kavman i no helpem yu; Sapos yu no vot yu no sakem toktok. Yu mas vot blong holem kavman i akaontabol long wanem hemi mekem.”

Mr Kalo i talem se seves diliveri i no kasem gud ol yut from plante polisi i luk naes long pepa be komitmen blong kavman i wan nara samting.

“Sapos yumi setem ap ministry blong youth, be fulap long ol mani ia we yumi talem se hemi wan percent long total kavman badjet, hemi kam i stak nomo long ministry. Ale yumi stap inkrisim ministry blong kat ol DG mo director, i save luk gud long ol pepa be samtaem mani i save stak afta i no kasem level daon.

“Yumi mas mekem sua se ol mani ia i mas kasem ol las yut daon longwe blong bildim economi mo lida blong tomoro.”

Mr Tamara i talem se seves deliveri hemi taem wan man i givim wan vountari seves long wan man. Seves hemi taem yu kat akses long transpot. Yu kasem wan Ofis, oli givim yu infomesen o yu ko long hospital from seves.