VT 60million blong ol pipol wetem disabiliti

Australia mo New Zealand i kivim VT 60million blong sapotem ol disable pipol raon long Vanuatu.

VT60million ia, Kavman blong Australia i givim ova VT 23million mo New Zealand Kavman i givim klosap VT37 million blong sapotem Vanuatu Society for People with Disability long ol seves blong hem.

New Zealand High Commissioner long Vanuatu, His Excellency, Jonathan Schwass, i talem se disability hemi wan impoten samting long Kavman blong New Zealand long saed blong human raet.

“International human raet plan blong mifala i talem se mifala i mas protektem mo promotem olgeta raet blong pipol wetem disability,” Mr Schwass i talem.

“Principal ia hemi wan top developmen long kaontri blong mi espeseli long ol aktiviti blong mifala long pasifik.

“Mifala i tinkse hemi impoten tumas se recovery program blong Saeklon Harold i mas kat gudfala sapot long olgeta pipol wetem spesel nid from olgeta nao i afek bigwan.”

Executiv Director blong Vanuatu Society for People with Disability, Elison Bovu, i talem se hemi wan milestone long history blong organization blong kasem kaen vatu olsem blong sapotem seves i ko long ol disable pipol blong Vanuatu.

“Organisation i stap luk fowod longtaem vinis blong save karem wan fanding olsem,” Ms Bovu i talem.

“Hemi tekem taem from yumi mas bild ap oragnisation fastaem blong karem trast blong ol dona patna.

“Mo Australia mo New Zealand i jes ansarem nid ia.”

Acting Australian High Commissioner long Vanuatu, Her Excellency Clemency Oliphant, i talem se impak blong Saeklon Harold long April 2020 mo COVID-19 pandemic i mekem i had long ol disable pipol blong kasem ol basic nid.

“Mi glad tumas we Australia i patna wetem New Zealand blong save sapotem ol disable pipol,” Ms Oliphant i talem.

“Mi hapi long longtaem patnasip we Australia i kat wetem Vanuatu blong stap sapotem ol impoten program olsem.”

Fanding bae hemi helpem Vanuatu Society for People with Disability blong diliverem sapot i ko long ol disabiliti long ol komuniti.

Sapot blong tufala partna kaontri ia i folem Vanuatu Recovery Strategy 2020 to 2023  mo hemi beis blong stregnthenem disabiliti sapot we i stap finis.

 

 

 

(Visited 288 times, 1 visits today)

About The Author

You might be interested in