VT 8million blong 41 independens selebresen

Kavman i aloketem VT 8 million blong 41 Independens aniversari blong Vanuatu.

Lord Mayor blong Port Vila City mo semtaem Chairman blong 41 Independens selebresen long Port Vila, Eric Puyo Festa, i konfemem amaon ia long VBTC Nius tete.

Amoan blong Mani ia bae evri provins long kaontri i sherem plus ol ni-Vanuatu we oli stap long New Caledonia mo sam studen long New Zealand.

“Budget blong yia ia hemi no wan bigfala budget,” Mr Festa i talem.

“Amaon blong mani ia bae yumi serem VT 350,000 long ol six provins long kaontri.

“Smol amaon blong VT 50,000 i sud ko long Fiji mo Papua New Guinea mbe from COVID mekem komiti disaed blong nomo putum.

“Mbe VT 100,000 bae i ko long New Caledonia from plante Ni-Vanuatu longwe oli stap vot from ol Memba blong Palemen long Vila.”

Secretary General blong Torba Provins, Reynold Surmat, i talem se oli no kasem mani ia yet.

Hemi talem se Torba Provins i kat 10 selebresen site mo mani ia bae no naf nomo.

Joe Iautim i talem se oli nosave VT 350,000 ia yet mo sps oli risivim bae oli serem long wan wan eria counsel.

Hemi talem se ol selebresen komiti i mas faenem ol nara wei blong vatu sapos oli stap tinktink long ol aktiviti.

Torba mo Tafea provins i kasem wan budget blong VT 5 million long yumi 40 selebresen long 2020.

Ministry blong Internal Affairs i talem se evri yia independens selebresen budget hemi VT 8 million mbe from long 2020, Vanuatu i selebretem 40 yia blong fridom mo hemia nao budget hemi VT 100 million.

Mr Festa i talem se Port Vila independens selebresen long yia ia bae i stat long 28 kasem 30 July long Independens Park.

Hemi talem se Port Vila i kat fulap mix reis pipol olsem olgeta blong Samoa, Fiji, Tahiti, New Caledonia mo Independence komiti i wantem involvem evri wan.

“Mi askem pipol blong selebrete wetem kea,” Mr Festa i talem.

“Polis bae i patrol so yumi no nidim ol man blong drink mo draev.

“Pipol i mas selebretem wetem glad heart from yumi independent; Mo yumi mas tinkbaot strakol blong ol papa blong Independens blong yumi save kat fridom long own koantri blong yumi.”

Wan founding papa blong Vanuatu independence i bin talem se ol pipol i no sud tekem independens olsem nating nomo.

Pastor Sethy Regenvanu i talem se strakol we oli bin ko tru long hem blong kasem fridom blong Vanuatu, hem i bin wan had wan from laef blong olgeta i bin stap long denja.

Pastor Regenvanu i talem se laved blong Independens long July hemi no wan taem blong drong mo mekem mani.

Hemi talem se hemi taem blong pipol i reflek bak long ol ajivmen mo kontribut long divelopmen blong futja generation.