VT10 shell kava long Motalava

Wan kava bar long Motalava i disaed blong statem VT 10 shell folem COVID pandemic.

George Wulem, Owna blong Yeheg No kava bar long Nerenigman vilij, i talem long VBTC Nius long aelan blong Motalava se hemi wantem se kava drink i jip nomo long taem we virus blong COVID-19 i stap hitim Wol.

“Long aelan espeseli long ol rimot eria, mani i no ron gud tumas so hemia nao mi statem shell blong kava long VT10 blong pipol i faenem i isi, ” Mr Wulem.

“Sapos wan man i kat VT200 mbe hemi wantem drink kava hemi save drink kava long haf mani mo haf vatu i save yusum blong pem wan smol kakae blong famili.

Yeheg No kava bar i stat long VT10,VT20 i ko antap.

Mr Wulem i talem se hemi stap salem jus blong kava long Vanualava.

“Mix blong kava hemi strong mo yu drink smol nomo yu save drong,”Mr Wulem i talem.

“Naoia we Kavman i talem se yumi mas fokas moa long prodaktiv sekta, hemi taem ol fama i step ap blong planem moa kava blong mitim demand long maket.

‘Plante man tete oli drink kava mo kava bisnis i helpem plante hom long saed blong pem skul fi mo ol nara nid long hom.

Yeheg No hemi native language blong Motalava we Mr Wulem i talem se hemi minim se taem hemi stap bildim nakamal ia plante man i laf long hem from oli no tink se hemi save statem wan bisnis.

Ol fama we Mr Wulem i stap tekem kava long olgeta oli kat ol own bot we oli kam stap dropem kava long aelan blong Motalava.

Mo long wan naet olsem hemi winim VT8000.

“I kat wan smol eria long nakamal we ol mama i save tekem ol VT20 lokol kakae mo salem taem ol man i kam drink kava,” Mr Wulem i talem.

Nakamal ia i open long August 2021 mo oli lonjem niufala uniform blong hem long Novemba.

 

 

(Visited 282 times, 1 visits today)

About The Author

You might be interested in