VT13.6 million long Moso Landing electriciti

Thirty household long Moso Landing(Meten), Efate oli benefit long UNELCO electricity netwok projek blong VT13.6 million.

Lonjing i hapen long Friday mo Minista blong Finans, John Salong nao i mekem opening blong laet ia.

Director General blong UNELCO, Frederic Petit i talem se hemi gud blong pipol i akses long laet.

“Projek ia hemi VT13.6 million we Unelco i investem . So hemi fandem wetem ol invoice we ol past kastoma oli pem.I mekem se naoia we yufala we kam olsem ol kastoma blong Unelco, ol tink we yu pem i ko blong pem mazut, pem olgeta blong unelco mo tu fandem budget blong Unelco mo hemi pat long ol fiuja koneksen,” Mr Petit i talem.

“Tete estimation se bae i kat 30 famili we bae oli konek long fiuja. Might bae yumi talem se hemia i smol, be long fiuja taem pawa line i stap be sam man oli kam kolosap mo bae i mo isi.

“Pawa ia hemi impoten from yu save mekem wota mo smol bisnis, Taem yu luk long Emua, Paunganisu mo Tanoliu yu luk ol sto o restaurant mo hemi gud.

“Olsem i save sapotem famili blong kat wan fridge mo long Wol Cup yu save sapotem franis,” hemi laf.

“Talem tankiu long kavman, komuniti mo ol sub kontrakta we oli wok long plesia. Sub contrakta hemi Vate electrics we i minim se mani we i ko long netwok ia

“Ok i kat ol poles, ol laen wetem ol mita be i kat mani i ko long kampani blong Vanuatu mo hemi impoten. Hemia hemi mani we i kobak insaed long economic blong kaontri. Hemi impoten.”

Area Secretary blong Not West Efate, Joel Abel i talem se laet hemi wan esential service blong pipol i kontribut long society blong olgeta.

“Mo oli so fortuneit blong kat developmen ia. Mi wantem talem tu se long Not West Efate eria kaonsel yumi stap luk laet vinis, 20% blong ko mo flatem. So hemia hemi wan bigfala ajivmen from seves blong laet i kam long komuniti.

“Wantem talem olsem se yumi no luk laet nomo mbe luk aotsaed long wanem nao laet i givim long yumi. Hemi wan opotuniti we ol skul pikinini i kambak long skul mo onem laet blong save luk buk blong olgeta. So mekem yus mo manejem gud laet.”

Mr Petit i stresem se electrisiti i kat denja long hem.

“Hemi wan samting we i save kilim man mo pipol i mas tinkbaot,” Mr Petit i talem.

“Sapos wan capol i foldaon long Saeklon, yu no tajem. Yu luk se wan capol i no taet gud long post, yu kolem olgeta long Unelco i kam fixim. Yu no klaem long post . Yu save klaem long kokonas mo fulap tri be no klaem long post so hemi wan samting we hemi impoten.

“Long taem naoia hemi COP27, hemi mo long saed blong environmen. Olsem wanem i hapen long fuija long Wol espeseli long Pacific aelan. Yu harem long rising sea level hemia hemi wan reality. Hemia hemi kamaot wetem gaswell we hemi rabis gas we i mekem se weta bae i nogud o i moa hot. So yu mas yusum pawa taem yu nidim sapos yu no nidim yu ofem from i gud long invoice mo environmen.”

Ol mama i talem se oli glad from bae i helpem olgeta blong mekem smol bisnis blong sapotem famili.

(Visited 44 times, 1 visits today)

About The Author

You might be interested in