VT3 billion blong impruvum Luganville Wota Saplae

Asian Development Bank i fandem projek blong impruvum Luganville Wota Saplae long VT3 billion.

Acting Director blong Dipatmen blong Water Resource, McCarthney Aga, i talem se projek ia hemi bigwan mo blong impruvum system ia i nidim wan bigfala mani so Kavman i glad long sapot we i kam.

Mr Aga i talem se projek i stat vinis we i luk kontrakta i stap priperem ol design dokumen blong tenderem aot ol wok.

Hemi talem se wok i sud stat en blong yia ia o 2023.

Pipol i kontinu blong reisem konsen long pua wota saplai system blong Luganville Taon long Santo se hemi no sef.

Ol pipol ia we oli talemaot nem blong olgeta i talem se wota saplai ia i no klin blong pipol i drink mo fulap taem i stop ron witaot infomem olgeta.

Mr Aga i talem se oli traem best blong sastenem olfala system ia wetem risos we oli gat.

“Yumi stap risivim ol komplen mo hemia Dipatmen i awea long hem mo blong mi stresem se Luganville wota saplae hemi wan bigfala infrastructure we hemi olfala lelbet,” Mr Aga i talem.

“Kavman tru long dipatmen hemi stap lukaotem infrastructure ia wetem limit risos. Mo hemi kat bigfala plan blong impruvum wota saplae ia. Naoia mifala i stap mekem ol smol meintenens nomo fastaem blong adresem sam eria we komplen i kam plante long hem.”

Mr Aga i se afta long projek ia kavman i plan blong kivimaot wota saplai ia long nara kampani i ranem.

 

 
 
 
 
(Visited 313 times, 1 visits today)

About The Author

You might be interested in