VT4 billion blong rikavari-Kavman netwok

Cost blong rikavari long cyber security attack long Kavman netwok system long Novemba 2022 hemi estimeit long VT4 billion.

Cyber attack ia i bin putum wan bigfala hadwok long kavman folem ol data blong infomesen we oli nomo save aksesem hemia i pusum kavman blong invest kwik taem blong   rekonstraksen blong niu netwok sistem blong kavman long tu manis taem.

Chief Information Ofisa long OGCIO, Gerard Metsan i talem se cost we oli estimatem blong ful rikavari hemi VT4 billion.

I kat tri steij blong cyber attack recovery we Ofis blong Governnment Chief Information Ofisa(OGCIO) i stap lukluk long hem we hemi immediate, short term mo long term recovery.

“Cost blong wan category 5 Saeklon hemi loa long wan cyber security atak; Hemi wan bigfala cost blong kavman, ” Mr Metsan i talem.

“Long saed blong rikavari kasem long namba tri steij hemi kasem VT4 billion.”

Mr Metsan i talem OGCIO i no save disclosem o givim aot infomesen long who stret ol ataka ia yet mo hemi se forensic tim i stap lukluk mo investigeit.

“Ol forensic aktiviti blong mifala long cyber atak ia oli no vinis yet; Mifala i stap wok long hem yet, hemi wan sensitive topik lelbet from yumi save expose bakegen long atak. So hemia nao mifala i dil wetem carefuli,” Mr Metsan i talem.

Mbe Mr metsan i talem se wetem fulap wei we oli bin mekem wetem ol IT expert raon long wol blong solvem isu ia, oli faenem aot se bae oli nomo save karem bak olfala sistem ia.

Wan IT expert we hemi bin involve blong buildim original sistem blong kavman ia, Ed McGuire i talem se i kat fulap lesson blong kavman i learn long hem blong i nomo kat wan nara cyber atak.

“So mifala i mas wok blong kat ol data i redi from sapos i kat wan moa cyber atak bae mifala i redi blong rispon,” Mr McGuire i talem.

“Mo mifala i kat ol data i sto kwik.”

Long wan toktok afta long speech blong hem long Information Communication Technology dei tete, Prime minista, Ishmael Kalsakau i talem se nomata long attack ia 90% blong niufala kavman sistem i stap wok vinis.

“Hemi 90% we yumi kambak, mo i no longtaem bae yumi stap long wan steij we yumi beta infom blong save tekem aksen long ol kaen insiden olsem long fuija,” Prime Minista Kalsakau i talem.

Cyber attack ia bambae stap olsem wan long ol bigfala wan long Vanuatu.

by Jamie Brown.