VT600 million blong lokol bisnis

Kavman i handem ova VT600 million long Rural Development Bank long wik ia blong groem ol lokol bisnis.

Bifo long handing ova blong jek mani ia, Minista blong Finance mo Economic Management, Honoroble Johnny Koanapo wetem niufala administrata blong Rural bank we Reserve Bank i apointem, Glen Craig i saenem wan Commercial agrimen bitwin Kavman mo bank, blong soem se bank i stap olsem borowa blong mani.

Minista Koanapo i talem se nekis wik i ko Rural Development Bank i sud stat blong implementem ol polisi blong hem.

Hemi talem se kavman i bin apruvum VT1.1 billion blong bank ia, mo VT600 million hemi pat long hem.

Minista Koanapo i talem se mein tinktink hemi blong helpem stimulatem economi tru long developmen blong prodaktiv sekta.

“Akrimen bambae hemi bringim tu klos diskasken mo openem japta blong yumi wok mo implemtem ol polisi,” Minista Koanapo i talem.

Niu Administrata blong Rural Development Bank, Glen Craig, i talem se bae i kat ol polisi mo prosija blong alaoem ol smol grasrut pipol i save aplae from vatu long ol provins.

Hemi talem se bae ol staff blong bank i stap ko long ol provins long seken mo namba tri wik blong January 2022.

“Bae mifala i ko wetem wan tim blong lending blong save lendem mani long ol pipol,” Mr Craig i talem.

“So evri smol man we oli wantem borow wan amaon blong vatu se VT50,000 kasem VT3 million we i dipen long bisnis tinktink o bisnis plan, mifala i lukluk lem. Loan term hemi kasem tri yia, mo interes reit hemi 4 per cen. Mifala i givim taem long ol man blong statem bisnis, blong karem mani i kam insaed mo oli save stat blong pem bak ol loan blong olgeta.”

Mr Craig i talem se bai oli stat blong mekem rekruitmen.

“Bae mifala i tekem in tri o fo staff long January mo February 2022 we mifala i singaotem ol Executiv legal staff,”Mr Craige i talem.

“Hemia bae hemi niufala Chief Executive Ofisa, wan bae i lukaotem accounting mo wan niu hed blong lending mo Prodak.”

Mr Craige i talem se stat long nekis wik i ko pipol i save go long ofis blong askem infomesen abaot loan we bai oli kivim aot.

Minista Koanapo i enkarejem ol pipol blong oli mas mek yus long mane ia blong kriatem ol bisnis we i save gro mo no misyusum ol mane we oli karem long bank.