Waet copra blong VT 75,000 wan tan

Pacific Pride, onli buya blong waet copra long Vanuatu i liftemap praes blong waet copra long VT 75,000 long wan tan.

Manager blong Pacific Pride Limited, Nikhil Ms, i talem se kampani i stap pem naoia waet copra blong VT 75,000 long wan tan mo black copra blong VT 48,000 long wan tan.

“Mifala i stap plan tu blong pem shel blong kokonat long olgeta fama long samples VT 10-15,000 long wan tan mo plan blong pem tu skin blong kokonat,” hemi talem.

“Mo long futja, wan fama i save tekem ova VT 100,000 long wan tan blong waet copra.”

Mr Ms i talem se waet copra hemi blong yusum long oil mo ol kokonat shel i save yus olsem jakol from hemi kat hae diman raon long Wol.

Blong produsum wan waet copra, ol fama i mas karemaot ol skin blong kokonat; katem long tu pis; putum ol kokonat ia long wan hot-air dryer mo mekem oli fes daon;mo afta tu o tri dei, hitim olketa mo scrapem aot copra long shel blong kokonat.

Ol fama i save yusum eni kokonat mo i no navara kokonat.

Pacific Pride Kampani i talem se hemi stap pem naoia waet copra long Santo mo Malekula mbe taem hemi setem ap ol agent blong hem, hemi plan blong pem waet copra long ol nara aelan tu long kaontri.

Mr Ms i talem se hemi no wan had wok blong produsum waet copra mbe i nid blong kat moa awarenes blong ol fama i andastanem proses.

Hemi talem se waet copra hemi wan prodak we fama i save mekem moa mani mo kampani blong hem i bin stap ranem ol infomesen sesen blong ol Ni-Vanuatu fama i andastanem hao blong produsum.

Mr Ms i talem se waet copra i atraktem ol gudfala praes from hemi hae grade copra long Wol.

Hemi talem se naoia ol Ni-Vanuatu fama oli no stap produsum fulap waet copra mbe kampani i bin sabmitim wan plan i ko long Kavman blong trenem ol fama long hao blong produsum.

“Once ol fama i andastanem mo save hao blong produsum waet copra, bae oli save stat blong produsum plante,” hemi talem.

Pacific Pride hemi wan kampani blong India we i beis long Santo, mo stap pem waet mo black copra.