Wan long hom kwarentin long Wunpuko

Wan man i stap long hom kwarantin long Wunpuko Vilij long Notwes Santo.

Man ia i stap long hom kwarentin naoia afta we helt respons tim i identifaem hem olsem wan klos kontak blong wan man long yacht we i bin kam sho long Wunpuko.

Manager blong Sanma Public Health, Vanua Sikon, i talem se man ia i stap long hom kwarantin naoia anda long supervision blong jif mo ol nara lida insaed long komuniti blong Wunpuko.

Mr Sikon i talem se wetem jifly strakja we i stap long komuniti long Wunpuko, ol polis blong jif long komuniti oli ensuarem se close kontak hem i mas remain long kwarentin long wan separate haos.

Hem i talem se Wunpuko Village i stap long wan lok daon naoia, kasem taem ol swab test risal blong tufala man long yacht i kambak negativ.

“Lokdaon i stap long patikula komuniti ia. I nogat eniwan i travel aot by boat o kenu. Even ol vilij kolosap oli stepem ap ol mesa blong olgeta blong no ko long Wunpuko,” Mr Sikon i talem.

Hem i talem se ol swab test risal blong tufala man long yacht i sud kambak bifo Friday.

Hem i talem tu se rispons tim i bin tekemaot ol passport blong ol crew long yacht ia mo ol dokumen blong yacht.

“Yacht we hem i stap bae i folem mifala kasem Luganville mo tete long aftanun mifala i sud rilisim wan risk asesmen ripot we tim i bin mekem. Hem ia bae i detamaenem moa aksen we ol otoriti konsen bae oli tekemap,” Mr Sikon i talem.

Chief David Molisa blong Wunpuko Village, i talem se since Sunday oli bin stopem pablik gathering blong ristriktim muvmen blong ol pipol.

Chief Molisa i talem se scul mo clinic long vilij hem i klos mo ol pipol i stap nomo long ol yard blong olgeta.

Mr Sikon i talem se response tim i bin toktok wetem ol key pipol insaed long komuniti olsem jif mo helt woka mo ol nara influential pipol long komuniti blong kontinu blong advoket long ol pipol.

Hem i talem se oli mekem aweanes tu long ol pipol mo assurum olgeta blong oli no mas panic mo fraet. Bifo Fraedei tim i sud kivim bak wan rispons long komuniti.

Yacht ia i bin kam sho long Wunpuko long Sandei moning mo wan man long yacht ia i bin ko long komuniti.

(Visited 1167 times, 1 visits today)

About The Author

You might be interested in