Wan mas blong tekem COVID vaccine

Ol pipol i mas tekem COVID-19 vaccine from limit helt risos.

Leomala Medical i askem ol pipol blong tekem COVID-19 vaccine from limited helt risos blong helpem ol sikman wetem COVID-19.

Dr Basil Leodoro, Director blong Leomala Medical mo Surgeon long Northern Provincial Hospital, i enkarejem ol pipol blong tekem COVID-19 vaccine from i gat fo ventileta masin nomo. Tu long Northern Provincial Hospital long Santo mo tu long Vila Central Hospital long Port Vila.

Ventileta o ventilesen masin hemi wan spesel masin blong helpem ol sik man we oli no save pulum win o olgeta we ol dokta i wandem putum oli silip blong save operet long olgeta.

“Wari blong ol pipol olsem mi,Ministry blong Health mo Kavman se sapos umi kat tu ventileta masin long Port Vila mo tu long Santo mo afta ol sik man i nidim ventileta masin, kwesten we bae i kam daon long mifala ol dokta se hu bae hemi karem ventileta masin, ” Dr Leodoro i talem.

Dr Leodoro i talem se hemia bae oli mas jus blong wia nao i tekem tritmen long spesel masin ia.

“Weta olfala ia blong Ambrym wetem heart problem, o olfala woman blong Bankis wetem asma o sotwin, o wan smol pikinini we kam in, bae mifala i mas jus se hu nao bae i yusum masin ia, “ Dr Leodoro i talem.

“Nao hemia i wan situasen we mifala ol dokta i prea blong i neva kasem yumi long Vanuatu.”

COVID-19 hem i mekem man i faenem i had blong pulum win mo wan ventileta masin nomo i save helpem hem.