Wan moa COVID ded

Vanuatu i konfemem wan moa ded long COVID.

Minista blong Health, Bruno Leingkone i anaonsmen long National TV tete.

Minista Leingkone i talem se kes ia hemi wan olfala man we i kat 66 yia.

“Hemi lusum laef blong hem long April 2 long Vila Central Hospital,” Minista Leingkone i talem.

“Hemi bin kat wan health underlying kondisen(kat sik vinis) afta hemi kasem sik COVID. Olsem minista blong health mi wantem tekem taem ia blong serem sori long bihaf blong kavman mo pipol blong Vanuatu i ko long ol famili long sad taem ia we yumi stap ko tru long hem.

“Hemi prea blong mi se Papa God bae hemi kontinu blong comfortem yumi evriwan. Kasem tete Vanuatu hemi rikodem tri ded blong COVID.

Minista Leingkone i askem pipol we oli kat sik vinis blong mas tekem stik blong no save sik bigwan.

“Yumi mas kasem tu stik mo tekem bosta dos blong save helpem immune system blong faet akensem sik ia,” Minista Leingkone i talem.

“Mi wantem enkarejem ol pipol blong sapos oli sik oli mas ko long hospital blong askem help. Ol pipol i mas protektem olgeta espeseli ol pipol we oli kat sam sik vinis.

Minista Leingkone i talem se olgeta woman we oli kat bebe oli kat risk blong sik ia tu.

“Yumi mas wok tugeta blong slowem daon spread blong virus ia,” Minista Leingkone i talem.

“Mi askem ol jif blong wok tugeta long taem naoia.”

Vanuatu i kat naoia 4527 kes sins January. Eleven pipol oli admit i stap long hospital mo four oli stap long kritikol kondisen.

Eighty-Seven niu kes long las 24 haoa.  Twenty Three long Shefa mo 64 long Sanma.

Minista Leingkone i talem se i kat dikris long kes folem namba blong tes we health i bin mekem.

Semtaem Minista Leingkone hemi anaonsem tu se sam health woka long Tanna oli stap long kwarentin from we oli kam klos kondak wetem wan COVID positive kes long wan ship.

 

(Visited 1565 times, 1 visits today)

About The Author

You might be interested in